Քիչ առաջ եվրոպական լրատվամիջոցները տեղեկացրին, որ Մալթայի միջազգային օդանավակայանում վայրէջք է կատարել երկու լիբիական կործանիչ: Միանգամից մի քանի եվրոպական երկիր իրենց ռազմաբազաներում հայտարարել են տագնապ` մտավախություն ունենալով, որ քաոսը, որ տիրում է Լիբիայի զինված ուժերում կարող է անկանխատեսելի հետևանքներ ունենալ::
Ինչպես փոխանցում է Al-Jazeera-ն, չճշտված տվյալներով, կործանիչների օդաչուները չեն ենթարկվել Քադաֆիի զինվորականների հրամաններին` ռմբակոծելու Բենղազի քաղաքը, որը գտնվում է ցուցարարների վերահսկողության տակ, և հեռացել են չեզոք երկիր: Եթե այս տեղեկությունները ճշտվեն, ապա կհաստատվեն այն լուրերը, համաձայն որի` Քադաֆիի ռեժիմը ռազմական օդանավերով է փորձում ճնշել ժողովրդական բողոքի ակցիան:
Մի քանի ժամ առաջ հրաժարական է տվել Լիբիայի արդարադատության նախարար Մուստաֆա Մուհամադ Աբդ Ալ-Ջիլեյլը, որը դրանով իր բողոքն է արտահայտել ցուցարարների դեմ բռնի ուժ կիրառելու համար: Այս մասին հաղորդում է BBC-ն: Մենք արդեն տեղեկացրել էինք, որ հրաժարական են տվել և ցուցարարների պահանջներին են միացել մի քանի բարձրաստիճան դիվանագետ: Նրանց թվում են` Լիբիայի ներկայացուցիչը Արաբական երկրների լիգա կազմակերպությունում և դեսպանը Չինաստանում: ՄԱԿ-ում Լիբիայի փոխդեսպան Իբրահիմ Օմար Ալ-Դաբաշին BBC-ի հետ զրույցում ասել է, որ Քադաֆին այլևս չի կարող երկար մնալ իշխանության` հույս հայտնելով, որ նա խիստ պատժի կենթակվի:
Լիբիական հեռուստատեսությունն անընդհատ հնչեցնում է զինվորականության կոչը` հեռու մնալ քաղաքներում գործող հրոսակախմբերից` դրանով փորձելով զսպել մարդկանց` չմասնակցելու բողոքի ակցիաներին: Լիբիայի ղեկավար Մուամար Քադաֆիի որդին Սեյֆ Ալ-Իսլամը հրահանգել է ստեղծել հետաքննող խումբ` միջազգային դիտորդների մասնակցությամբ, որոնք կպարզեն այս բախումների պատճառները և մեղավորներին: Բոլոր փորձագետներն այս քայլերն այլևս ուշացած են համարում:
