ՆԺԿ առաջնորդ Արամ Կարապետյանը և ԱԺ ՀՀԿ խմբակցության պատգամավոր Արտակ Զաքարյանը լրագրողների հետ հանդիպման ժամանակ անդրադարձան ներքաղաքական զարգացումներին:
Կարապետյանը նշեց, որ աշխարհում տեղի ունեցող հեղափոխական զարգացումները կարող են հասնել նաև Հայաստան: «Հուշագիր ստորագրած բոլոր կուսակցությունները պետք է հիմա մտածեն ինչպես կարող են անարյուն իշխանությունը փոխանցել այլ քաղաքական ուժերի»:
Կարապետյանը նաև շեշտեց, որ Հայաստանում հեղափոխական տրամադրությունները կսաստկանան մարտին. «Ցասումը լինելու է: Միակ հարցն այն է՝ անարյուն կլինի, թե ոչ»:
Արտակ Զաքարյանը, չհամաձայնելով Կարապետյանի հետ, ասաց, թե Հայաստանում կան ընդդիմադիր ուժեր, որոնք հույս ունեն երկրում առկա դժգոհությունների միջոցով հասնել իշխանության: Զաքարյանը նշեց, որ ընդդիմության հույսերը չեն արդարանա, և վերջինս հիասթափվելու է, քանզի մեր երկրում ներքաղաքական գործընթացները շատ լավ վերահսկվում են: Նրա դիտարկմամբ, եթե հրահրողներ չլինեն, ապա առաջիկայում հնարավոր կլինի խուսափել արյունալի իրադարձություններից:
