Լրագրողների հետ հանդիպման ժամանակ ՍԴՀԿ ատենապետ Լյուդմիլա Սարգսյանը և ԱԺ ՀՀԿ խմբակցության պատգամավոր Լեռնիկ Ալեքսանյանը, անդրադառնալով ներքաղաքական խնդիրներին փաստեցին, որ դաշտը բավականին ակտիվացել է:
Լյուդմիլա Սարգսյանը ասաց, թե կոալիցիոն հուշագրի ստորագրումը ցույց է տալիս, որ իշխանությունները ավելի տեսանելի են համարում արտահերթ ընտրությունները և փորձում են դրանց ավելի արագ պատրաստվել: Այս ամենը ապացուցում է, որ իշխանությունները ինքնավստահ չեն առաջիկա ընտրություններում:
ՀՀԿ-ական պատգամավոր Լեռնիկ Ալեքսանյանը նշեց, որ ներքաղաքական ակտիվությունը հիմնականում կապված է առաջիկա ընտրությունների, ինչպես նաև արաբական աշխարհում կատարվող իրադարձությունների հետ: Նա ողջունեց ՀՀԿ-ԲՀԿ հարաբերությունների հստակեցումը և նշեց, որ սա բխում է թե՛ ՀՀԿ-ի և ԲՀԿ-ի, թե՛ ժողովրդի շահերից, որպեսզի առաջիկա ընտրությունները անցկացվեն առանց լարվածության: Լյուդմիլա Սարգսյանն էլ նկատեց, որ ՀՀԿ-ԲՀԿ հարաբերությունների հստակեցմամբ ԲՀԿ-ն կորցրեց իր անկախությունը, սակայն պարտադրված համաձայնությունը դեռևս հավատարմություն չի նշանակում, և առաջիկայում կարող են փոփոխություններ լինել: Լեռնիկ Ալեքսանյանը ևս նշեց, որ կոալիցիոն համաձայնագիրը իրավական ուժ չունի, և ամեն րոպե հնարավոր է, որ ԲՀԿ-ն այլ քաղաքականություն վարի: