Հայաստանի արտգործնախարարությունը տեղեկություն է տարածել, որ փետրվարի 23-24-ը Հայաստանում կլինի ԱՄՆ փոխպետքարտուղարը` Ջեյմս Սթեյնբերգը: Սթեյնբերգի կարևորությունը հիշատակելու համար արժե ընդամենը նշել, որ երկու տարի առաջ, երբ նա մի քանի ժամով այցելել էր Հայաստան` տարածաշրջանային այցով, նրա ճեպազրույցը մամուլի ներկայացուցիչների համար կազմակերպվեց հենց նախագահի նստավայրում: Այլ կերպ ասած՝ պարզ է, թե ինչ կալիբրի այց է սպասվում Հայաստան:
Հետևաբար հարց է առաջանում՝ ի՞նչն է դրա պատճառը, եթե նկատի առնենք, որ դեռևս երկու շաբաթ առաջ Մյունխենի անվտանգության համաժողովում Սերժ Սարգսյանը հանդիպում ունեցավ Սթեյնբերգի անմիջական ղեկավարի` Հիլարի Քլինթոնի հետ: Ուրեմն ի՞նչն է պատճառը, որ Քլինթոնը Հայաստան է գործուղում իր առաջին տեղակալին: Արդյոք խոսելու կիսատ բանե՞ր են մնացել, թե՞ առաջացել են այսպես ասած նոր իրողություններ, կամ Հայաստանի իշխանությունը այս ընթացքում չի կատարել Քլինթոնի այցի ընթացքում ստանձնած որոշ պարտավորություններ: Հնարավոր են թե՛ այդ, թե՛ այլ տարբերակներ:
Մասնավորապես, բավական ուշագրավ է նաև այն, որ մարտի 5-ին Սոչիում տեղի է ունենալու Հայաստանի, Ռուսաստանի և Ադրբեջանի նախագահների հերթական եռակողմ հանդիպումը՝ կապված Ղարաբաղի հակամարտության կարգավորման գործընթացի հետ: Ահա այդ ֆոնին էլ Սթեյնբերգի հայաստանյան այցը ուշագրավ է: Թե ինչը կարող է լինել դրա նպատակը՝ դժվար է ասել: Բայց եթե Ռուսաստանում այդ հանդիպումից առաջ ԱՄՆ շատ բարձրաստիճան դիվանագետը այցելում է Հայաստան, կնշանակի, որ նա կարծես թե ունի Հայաստանի իշխանությանն ասելու այլ բան, քան, ասենք, Ռուսաստանն է ասելու մարտի 5-ին:
Չի բացառվում նաև, որ Սթեյնբերգի այցի հիմնական շեշտը լինի ոչ թե Ղարաբաղի հարցը, այլ հայ-թուրքականը: Բանն այն է, որ վերջին շրջանում ԱՄՆ-ն բավական հստակ ազդակներ է հղում՝ կապված հայ-թուրքական հարաբերության գործընթացի վերաջերմացման հետ: ԱՄՆ-ին դա գուցե պետք է հերթական ապրիլի 24-ից առաջ համապատասխան մթնոլորտ ստեղծելու համար, որ նորից Օբամային հարմար առիթ լինի շրջանցելու «ցեղասպանություն» բառը:
Սակայն կասկած չկա, որ ինչ քայլեր էլ արվեն հայ-թուրքականի հարցում, դրանք, միևնույն է, այսպես թե այնպես, առնչություն ունենալու են ղարաբաղյան խնդրի հետ: Արժե հիշել, որ մոտ երկու շաբաթ առաջ ԱՄՆ պետքարտուղարության պաշտոնական ներկայացուցիչ Քրոուլին հայտարարել էր, որ ԱՄՆ-ն հայ-թուրքական գործընթացի համար աշխատելու է Թուրքիայի, Հայաստանի և Ադրբեջանի հետ:
Ի դեպ, չի բացառվում նաև, որ Հայաստանի իշխանական ճամբարի վերջին «եռակցումները» կրում են հենց արտաքին քաղաքական ոլորտում այդ դինամիզմի հետ կապված սպասումների ազդեցությունը: