Փետրվարի 20-ին Սյունիքի մարզի Կուրիս գյուղական համայնքում կայացած համայնքի ղեկավարի ընտրություններում 36 կողմ ձայնով համայնքի ղեկավար է վերընտրվել գործող գյուղապետ, ՀՀԿ անդամ, առաջադրված միակ թեկնածու Սուրիկ Գրիգորյանը:
Նշենք, որ 60 ընտրողից մասնակցել է հենց 36-ը: Սա, ըստ տեղամասային ընտրական հանձնաժողովի նախագահի, բացատրվում է նրանով, որ կուրիսեցները ձմեռը հիմնականում Մեղրիիում են անցկացնում և ճանապարհների փակ լինելու պատճառով չեն կարողացել մասնակցել քվեարկությանը: Սուրիկ Գրիգորյանը արդեն 10 տարուց ավելի է՝ գյուղապետ է ու ևս 4 տարի կղեկավարի Կուրիսը:
Քարաշեն համայնքի ավագանու 5 անդամի համար առաջադրված 7 թեկնածուներից ընտրվել են 4-ը, 2-ը հավաքել են 27-ական ձայն: Հավասար քվեներ ստացած թեկնածուների միջև թիվ 37 ընտրատարածքային ընտրական հանձնաժողովը կանցկացնի վիճակահանություն, որից հետո պարզ կլինի ավագանու 5-րդ անդամի անունը: Անկախ վիճակահանության արդյունքներից, Քարաշենում կլինի ՀՀԿ-ական, միայն արական սեռից բաղկացած համայնքի ավագանի: