Ըստ «Սյունյաց երկիր» պարբերաթերթի՝ «Դինո գոլդ մայնինգ քամփնի» ՓԲԸ-ի նախկին գլխավոր տնօրեն Ռոբերտ Ֆալետտան անհնազանդ հանքագործների հանդեպ էլեկտրաշոկ կիրառելու պատրաստություն էր տեսնում: Թերթի ունեցած տեղեկություններով, «այդ մասին ընկերության սեփականատերը տեղեկացվել է փոքր-ինչ ուշացումով, ինչը և դարձել է առանձնահատուկ քննարկման առարկա»:
Հիշեցնենք, որ «Դինո գոլդ մայնինգ քամփնի» ՓԲԸ սեփականատեր Dandee Precious Metals կանադական ընկերության Բուլղարիայի և Հայաստանի պատասխանատու կառավարիչ Ռիք Հոուսը, որը անցած ամիս Կապանում էր, հունվարի 26-ին աշխատանքից ազատեց Ռ. Ֆալետտային: Աշխատանքից ազատվեց նաև նրա կինը` Ֆարիդա Ֆալետտան, որը ընկերության անվտանգության և ակտիվների պահպանության գծով մենեջերն էր:
«Առաջին լրատվական»-ին հաջողվեց ճշտել, որ իրականում էլեկտրաշոկ գնել էին: Բայց դա ոչ թե անհնազանդ բանվորների համար էր, այլ պիտի օգտագործվեր հատուկ դեպքերում: «Դե, պատահում է, որ գիշերվա կեսին մարդիկ խմած գալիս են, կանգնում դարպասների մոտ, նույնիսկ պատահել է, որ զինված են եղել: Էլեկտրաշոկը այդ դեպքերի համար էր, որ անվտանգության աշխատակիցներն ու պահակները օգտագործեին»,- ասացին ընկերության պատասխանատուները:
Ի դեպ, մեր ունեցած տեղեկություններով, էլեկտրաշոկ կիրառելու գաղափարը նախկին տնօրենի կնոջ խորհրդով անվտանգության ծառայության ներքին աուդիտի պաշտոնում նշանակված Շահեն Բաբայանցինն էր, որը նույնպես ազատվել է աշխատանքից: