«Արյան դոնորներ ընտրելիս բժիշկները պետք է շատ ուշադիր լինել` վարակիչ հիվանդություններից և հատկապես ՄԻԱՎ-ՁԻԱՀ-ից խուսափելու համար»,- «Առաջին լրատվականին» ասաց ՀՀ ԳԱԱ բնական գիտությունների բաժնի ակադեմիկոս-քարտուղար Վիլեն Հակոբյանը:
Ակադեմիկոսի խոսքով, այժմ չափազանց կասկածելի են բոլոր այն մարդիկ, ովքեր դոնորներ են դառնում, քանի որ բոլորը գումարի կարիք ունեն: Այդ իսկ պատճառով պետք է խուսափել պատահական դոնորներից և իսկ ընտրվածների հետ լուրջ աշխատանք տանել, քանի որ նրանց արյունը հատուկ նպատակներով է օգտագործվելու:
«Հաճախ է պատահում, երբ արյան վարակիչ հիվանդությունների վարակներ են տարածվում նաև վարսավիրանոցների սանրերից կամ ատամնաբուժարաններում բուժվելիս. ամեն ինչից այսօր հարկավոր է զգուշանալ, քանի որ պայքարի միջոցները քիչ են ու դժվար»,- նշում է Վիլեն Հակոբյանը:
Ի դեպ, նրա խոսքով, հաճախ է լինում, երբ տվյալ անհատի մոտ վիրուսը հայտնաբերում են, սակայն համապատասխան անտիգեն չի արտադրվում, իսկ դա նպաստում է արյան միջոցով հիվանդությունների տարածմանը: Սրա դեմ պայքարելու կարևորագույն ձևերից մեկը արյան ռենտգեն ճառագայթումն է, որը մեզ մոտ դեռ չի կատարվում: