Գրեթե բոլոր եկեղեցական տոները, բացի ավանդական ծիսակարգից, զուգորդվում են նաև ժողովրդական ավանդական միջոցառումներով, որոնք թեև չունեն քրիստոնեական խորհուրդ, բայց տարիներ շարունակ նշվելով` դարձել են տոների բաղկացուցիչ մասը:
Այսպես ավանդական է դարձել, օրինակ, Վարդավառի տոնին ջուր ցանելը, Տյառնընդառաջին կրակ վառելը և Սուրբ Սարգսի տոնին աղի բլիթ ուտելն ու տան շեմին փոխինձով սկուտեղ դնելը:
Այս տարի Սուրբ Սարգիսի տոնը նշվելու է փետրվարի 19-ին: Աղի բլիթ պետք է ուտել այսօր` փետրվարի 18-ի երեկոյան:
«Աղի բլիթ ուտելուց առաջ կամ հետո պետք է անպայման աղոթել , որպեսզի ձեր երազանքը կատարվի»,-ասում է տեր Կարապետ քահանա Կարապետյանը:
Այսօր երեկոյան նաև փոխինձով մատուցարանը են դնում տան տանիքին և սպասում Ս. Սարգիս զորավարի ձիու պայտի հետքին: Ըստ ավանդույթի` ում մատուցարանի մեջ դրված փոխինձի մեջ դրոշմվի Ս. Սարգսի սպիտակ ձիու պայտի հետքը, այդ ընտանիքին հաջողություն է սպասվում:
«Սուրբ Սարգիսի մասին ավանդույթը դարերի պատմություն ունի: Սրբի կերպարը կա նաև «Սասնա ծռեր» էպոսում: Սասունցի Դավիթը խնդրում է սուրբ Սարգիսի օգնությունը և հաջողության հասնում պատերազմում և սիրո հարցում»,- հիշեցնում է քահանա Կարապետյանը: