Հավաստի աղբյուրները «Ժամանակ»-ին փոխանցում են, որ ՀՀ գլխավոր դատախազությունը թույլ չի տվել Գուգարքի բաժնի քննչական բաժնի քննիչին` կարել Լեռնապատի գյուղապետ Վանո Եղիազարյանի դեմ հարուցված, 11 միլիոն դրամ յուրացնելու մասին 12 հատորանոց քրեական գործը և պահանջել է այն:
Դրա համար հավանաբար հիմք են հանդիսացել մամուլում հայտնված այն հրապարակումները, որոնցում լեռնապատցիները հիմնավոր կասկած են հայտնել գյուղապետի նկատմամբ իշխանական վերնախավի որոշ անձանց կողմից հովանավորչություն իրականացնելու և նախաքննության վրա ազդելու մասին:
Հիշեցնենք, որ գյուղապետը, ում լիազորությունները չէին կասեցվել քրեական գործի հարուցումից հետո, ճնշումներ էր սկսել վերոնշյալ քրեական գործի շրջանակներում իր դեմ ցուցմունք տված համագյուղացիների նկատմամբ և դատական կարգով նրանցից ինչ-ինչ փոխհատուցումներ պահանջել ու պահանջում: Բացի դա, քննչական մարմնի մոտ գնացած գյուղացիներն ականատես էին եղել, թե ինչպես է գյուղապետը իր ծառայողական մեքենայով քննիչի մոտ բերում անճար որոշ գյուղացիների և փոխել տալիս իր դեմ նախկինում տված նրանց ցուցմունքները: Ու չնայած ականատես գյուղացիներն անմիջապես բարձրաձայնել էին այդ մասին` նշելով, որ մարզի իշխանական վերնախավի ու նաև ՀՀ գլխավոր դատախազության պաշտոնյաներից մեկի կողմից հովանավորչություն է իրականացվում, ինչի արդյունքում քրգործը կարող է փակվել, լեռնապատցիներն էլ` տուժեն, իշխանական մարմինների կողմից սկզբում մնացել էր անարձագանք: Սակայն երբ հրապարակվեց հիմնավոր կասկած հարուցող (հովանավորչության մասին) մեկ այլ տեղեկատվություն, ըստ որի Լեռնապատի գյուղապետը գյուղապետարանից էր կազմակերպել ՀՀ գլխավոր դատախազության կոռուպցիայի և կազմակերպված հանցավորության դեմ պայքարի վարչության պետ Արմեն Աշրաֆյանի հանգուցյալ քրոջ թաղման արարողությունը, ՀՀ գլխավոր դատախազությունը սկսեց տեղից շարժվել` պահանջեց քրեական գործը:
Կարելի է ենթադրել, որ գործի նկատմամբ դատախազական վերահսկողություն է սկսվել. այժմ, գործը պահանջած դատախազը նյութերին և գործի ընթացքին ծանոթանալուց հետո պետք է որևէ որոշում ընդունի: Դրա բովանդակությամբ պայմանավորված` տեսանելի կլինի գործի հետագա ընթացքը. կամ այն կուղարկի Գուգարքի բաժնի նույն քննիչի մոտ` որոշակի հանձնարարականներով, կամ կուղարկի նույն բաժնի այլ քննիչի մոտ, կամ ընդհանրապես կվերցնի ու կհանձնի ոստիկանության գլխավոր քննչական վարչություն, որպեսզի մարզային վերնախավի կողմից նախաքննության ընթացքը սխալ հունով տանելու հնարավորությունը եթե չվերանա էլ, ապա գոնե սահմանափակվի: Թե ինչ կտա նման շրջադարձը` ցույց կտա ժամանակը և կլուսաբանի «Ժամանակ»-ը:
Է.Մ. , «Ժամանակ» օրաթերթ