«Կոալիցիոն ուժերի ստորագրած հուշագիրը ամոթալի է մեր երկրի ու այն ստորագրողների համար»,- անդրադառնալով իշխանական ուժերի երեկ հրապապարկված փաստաթղթին` ասում է «Ժառանգություն» խմբակցության անդամ Ստեփան Սաֆարյանը:
Մեջբերելով մի հատված հուշագրից` Սաֆարյանը ապացուցում է ասածը. «Նշում են, որ նպատակ չունեն «կշիռ ավելացնել» խորհրդարանում: Այս արտահայտությունը հակաքաղաքագիտական է: Դա նշանակում է միջնեկ եղբայրը փոքր է մեծից, փոքր եղբայրը փոքր է միջնեկից: Այս փաստաթուղթը ամենամեծ կոռուպցիան է: Սա նշանակում է բաժան-բաժան անել աթոռները նախքան ընտրությունները` առանց ժողովրդի կարծիքը հաշվի առնելու: Սա ժողովրդի վրա թքել է»:
Քաղաքագիտական որևէ նշանակություն չունի նաև քաղաքական ուժերի այն հայտարարությունը, թե չունեն իրենց ծրագիրն ու իրենց թեկնածուն:
Փորձելով բացատրել, թե ինչու իշխանական կուսակցությունները նման համաձայնագիր ստորագրեցին հիմա` Սաֆարյանն ասում է.
«Այս իշխանությունը ստեղծել է վստահության ճգնաժամ: Նույնիսկ ամենաանմեղ առաջարկը, որ արվում է, նրանց կողմից դիտվում է որպես փորձ` իրենց աթոռից գցելու: Արդարության համար պիտի ասեմ, որ ԲՀԿ-ն ունի որոշակի ռեսուրսներ և, այսպես թե այնպես, տեղ կգտներ խորհրդարանում:
Իսկ ՕԵԿ-ն ուներ խորհրդարան մտնելու ռիսկեր, ուստի ստիպված եղավ ստորագրել կոալիցիոն հուշագիրն ու ասել, որ պաշտպանելու է Սերժ Սարգսյանի թեկնածությունը»:
Ըստ Սաֆարյանի՝ հուշագրի ակնարկն այն է, որ մեծից փոքր դասավորվածությունը պահպանվելու է, եթե հաջողվի տեղեր խլել ՀՅԴ-ից, ՀԱԿ-ից, «Ժառանգություն»-ից, ապա նաև կմեծացնեն խորհրդարանում ունեցած աթոռների թիվը:
