ԱՄՆ նախագահ Բարաք Օբաման հրամայել է իջեցնել դաշնային հաստատությունների պետական դրոշները` ի հիշատակ Վիսկոնսինի սիկհերի տաճարում տեղի ունեցած հրաձգության զոհերի: Այս մասին հաղորդում է Agence France-Presse-ը:
Մինչև օգոստոսի 10-ը իջեցված կլինեն Սպիտակ տան, դեսպանատների, հյուպատոսարանների, ԱՄՆ-ում արտասահմանյան այլ պաշտոնական ներկայացուցչությունների, բանակի և նավատորմի դրոշները:
Օգոստոսի 5-ին հանցագործը անկանոն կրակ էր բացել Օուք Քրիք քաղաքի սիկհերի տաճարում` սպանելով 6 մարդու: Դեպքի վայր մեկնած ոստիկանների պատասխան կրակից 40-ամյա նախկին զինվորական Ուեյդ Մայքլ Փեյջը սպանվել էր:
Փեյջի նման քայլի դրդապատճառները հայտնի չեն: Որոշ տվյալներով` նա կապված է եղել ռասիստական կազմակերպությունների հետ: Հաստատվել է, որ ատրճանակն ու զինամթերքը նա ձեռք է բերել օրինական ճանապարհով:
Հայտնի է, որ Փեյջը 1992-1998 թթ. ծառայել է ԱՄՆ բանակի հոգեբանական օպերացիաների բաժանմունքում: Ոչ պաշտոնական տվյալներով` Փեյջը զինվորական ծառայության ժամանակ ալկոհոլ է օգտագործել:
Վիսկոնսինում սիկհերի տաճարը բացվել է 1999 թվականին: Այն ժամանակ տաճարի մշտական այցելուները 400-ն էին: Ամբողջ աշխարհում հաշվվում է սիկհիզմի ավելի քան 25 միլիոն հետևորդ, մեծամասնությունը բնակվում է Հնդկաստանում:
