Մոլդովայի բնակիչների կողմից ալկոհոլի միջին տարեկան սպառումը կազմում է տարեկան 18.22 լիտր, այնինչ աշխարհում այդ թիվը չի գերազանցում 6.1 լիտրը: Այս մասին հայտնում է Vedomosti-ն` հղում կատարելով Առողջապահության համաշխարհային կազմակերպության տվյալներին:
«Ամենաշատ խմող» երկրների շարքում են Չեխիան՝ 16.45 լիտր տարեկան, Հունգարիան` 16.27 լիտր, Ռուսաստանը` 15.76 լիտր, Ուկրաինան` 15.6 լիտր, Էստոնիան` 15.57 լիտր, Անդորրան` 15.48 լիտր, Ռումինիան` 15.3 լիտր, Սլովենիան` 15.19 լիտր, Բելառուսը` 15.13 լիտր, Մեծ Բրիտանիան` 13.37 լիտր:
ԱՀԿ-ի զեկույցում նաև նշվում է, որ Մոլդովայի բյուջեում հատուկ հոդված կա, որով գումարներ են հատկացվում ալկոհոլիզմից բուժելու համար: Այսպիսի ծրագրեր իրագործվում են աշխարհի ևս 126 երկրներում:
ԱՀԿ-ն նաև հայտնում է, որ տղամարդկանց շրջանում մահացությունների մոտ 6.2%-ը պայմանավորված է ալկոհոլի պատճառով առաջ եկած հիվանդություններով, կանանց շրջանում այդ թիվը մոտ 1% է: Իսկ ԱՊՀ երկրներում և հատկապես Ռուսաստանում ամեն հինգերորդ մահի պատճառը ալկոհոլիզմն է: