Այսօր Արագածոտնի մարզի Թալին քաղաքում ընթանում են համայնքի ղեկավարի և ավագանու անդամի արտահերթ ընտրությունները: Շուրջ 5250 ընտրող ունեցող Թալինում քվեարկությունը տեղի է ունենում 3 ընտրատեղամասերում` ժամը 8-ից 20-ը:
Քաղաքապետի պաշտոնի համար պայքարում են 5 թեկնածու` հանրապետական Սարգիս Արամյանը, ԲՀԿ անդամ Վազգեն Խաչատրյանն ու անկուսակցականներ Էդվարդ Գրիգորյանը, Վորոշ Խաչատրյանն ու Գագիկ Կարապետյանը:
«Առաջին լրատվական»-ի տեղեկություններով` Թալինում ոստիկանությունն ուշադիր հսկում է, որպեսզի հանրապետականներից բացի ոչ ոք ընտրակաշառք չբաժանի: Մեր տեղեկություններով ընտրողներին գունավոր գրիչներ են բաժանում` նրանց քվեարկությունը վերահսկելու համար։
Թեժ պայքար է ընթանում: Նախկին քաղաքապետ Մնացական Մնացականյանը, դեմ գնալով Հանրապետականի որոշմանը, չի սատարում ՀՀԿ-ի պաշտոնական թեկնածու Սարգիս Արամյանին, այլ աջակցում է իր նախկին աշխատակից` Թալինի քաղաքապետարանի աշխատակազմի քարտուղար, անկուսակցական Վորոշ Խաչատրյանին:
Քվեարկության նախնական արդյունքները թ. 15 ԸԸՀ-ն կամփոփի և կարձանագրի մինչև օգոստոսի 6-ը` ժամը 14-ը:
