Բրիտանացի Մարկ Դագանի (ում մահը մեկ տարի առաջ Լոնդոնում զանգվածային անկարգություններ էր առաջ բերել) մայրը որդու մահվան մեջ մեղադրել է ոստիկանությանը: Այս մասին նա ասել է «Սքայ նյուս» հեռուստաալիքին տված հարցազրույցում, գրում է «ԻՏԱՌ ՏԱՍՍ»-ը:
2011 թվականի օգոստոսի 4-ին Լոնդոնի հյուսիսում տեղակայված Տոտենհեմ թաղամասում ոստիկանությունը Դագանին ձերբակալելու գործողություն էր անցկացրել: Մարկ Դագանը ոստիկանության գործողության ընթացքում մահացել էր կրծքավանդակին ստացած երկու կրակոցից:
Օգոստոսի 6-ին Տոտենհեմի շուրջ 120 բնակիչներ ոստիկանության շենքի մոտ բողոքի ակցիա էին կազմակերպել: Իրադարձությունները դուրս էին եկել վերահսկողությունից, ամբոխն այրել էր ոստիկանական մի քանի մեքենա: Դրանից հետո զանգվածային անկարգություններ էին սկսել:
«Սքայ նյուս»-ին տված հարցազրույցում Դագանի մայրը հայտարարել է. «Իմ որդին սպանվել է: Ես չեմ ասում՝ մահացել է, քանի որ նա սպանվել է»:
Մարկ Դագանի ընտանիքը հայտարարել է, որ ոստիկաններն առաջինն են կրակ բացել, որ իրենց որդին զենք չի ունեցել: Դագանի մահվան հանգամանքների հետաքննությունը պետք է ավարտվի հոկտեմբերին:
