Թուրքիայի ընդդիմադիր Ժողովրդահանրապետական կուսակցությունը վարչապետ Ռեջեփ Էրդողանից պահանջել է տեղեկացնել, թե ինչ քայլերի է նա դիմելու այն բանից հետո, երբ հրապարակվեց լուսանկարը, որում ԱՄՆ նախագահ Բարաք Օբաման` բեյսբոլի մահակը ձեռքին, հեռախոսով զրուցում է Թուրքիայի կառավարության ղեկավարի հետ: Այս մասին հաղորդում է Reuters-ը:
«Այս լուսանկարը բացահայտում է, թե ումից է մեր վարչապետը ստանում երկրի ղեկավարման հրամանները»,- հայտարարել է կուսակցության ներկայացուցիչներից մեկը: Իսկ կուսակցության փոխնախագահն էլ իր հերթին Էրդողանից պահանջել է տեղեկացնել` արդյոք տեսե՞լ է նա լուսանկարը և ինչ է մտադիր անել «Թուրքիայի և թուրք ժողովրդի հասցեին ուղղված քողարկված վիրավորանքի համար»:
Օբամայի և Էրդողանի միջև հեռախոսազրույցը տեղի է ունեցել երկուշաբթի` հուլիսի 30-ին: Թուրք քաղաքական գործիչների արձագանքին ի պատասխան` Սպիտակ տնից հայտնել են, որ լուսանկարի հրապարակման միակ նպատակը ամերիկացի և թուրք առաջնորդների սերտ համագործակցությունը ընդգծելն է. նրանք զրուցել են Սիրիայում վատթարացող իրավիճակի մասին:
Միևնույն ժամանակ թուրքական մի շարք ԶԼՄ-ներ լուսանկարին վերաբերել են հումորով: Լրագրողներից մեկը նույնիսկ կարծիք է հայտնել, թե սրա ամենախելամիտ պատասխանն այն կլինի, որ Էրդողանը զանգահարի Օբամային` ձեռքին ունենալով սպորտային կոշիկներ, գոտի կամ գրտնակ:
