Պարզվում է՝ մեր օրերում արդիական է դառնում Երևանում վարչական շրջանների ղեկավարների արձաններ կանգնեցնելը: Ահա այսպիսի մի արձան է շուտով վեր խոյանալու Նոր Նորք վարչական շրջանում: Մեզ լուրեր էին հասել, թե Աժ նախկին պատգամավոր Ռաֆիկ Պետրոսյանի որդու՝ նախկին թաղապետ Դավիթ Պետրոսյանի արձանն են կանգնեցնելու այստեղ: Մեզ հասած լուրերով` այդ գործը նախաձեռնել են նրա ընկերները: Անհավանական թվացող այս լուրերից տեղյակ չէին քաղաքապետարանում:
Լրատվության վարչության պատասխանատու Արթուր Գևորգյանը նախ հարցը գրավոր պահանջեց, ապա բանավոր ասաց, թե տեղյակ չեն, անգամ ընդլայնված նիստում նման հարց չի քննարկվել:
Սակայն պարզվում է՝ այս պատմությունը երկամյա կյանք ունի՝ թաղապետի մահվան ժամանակից ի վեր, և աշխատանքներ են տարվում արձանի պատրաստման ուղղությամբ: Այս մասին մեզ հայտնեց հանգուցյալ Դավիթ Պետիոսյանի հայրը՝ Ռաֆիկ Պետրոսյանը:
Ըստ նրա՝ այն երկու տարի առաջ նախաձեռնել է Նոր Նորքի թաղապետարանը եւ դիմել քաղաքապետարան: Այժմ էլ արձանի կառուցման աշխատանքներն են ընթանում, և հնարավոր է, որ մինչև Դավիթ Պետրոսյանի ծննդյան օրը՝ սեպտեմբերի 21-ը, հասցնեն տեղադրել:
– Պարոն Պետրոսյան, Նոր Նորքի ո՞ր մասում է տեղադրվելու:
-Հենց թաղապետարանի շենքի մոտ, որտեղ ինքը դրել ա Սաֆյանի արձանը, ով վարչական շրջանի հիմնադիին է եղել: Տղաս դրել է Սաֆյանի արձանը: Որովհետև ինքն էլ աշխատել ա այնպես, ինչպես Սաֆյանը, հիմա էլ թաղապետարանը միջնորդել ա, որ տեղադրվի իր արձանը:
-Իսկ կարո՞ղ է Սաֆյանի արձանը հանեն՝ Ձեր որդունը տեդադրեն:
-Չէ, ո՞նց կհանեն, երկուսինն էլ կլինի:
-Ինչո՞ւ է ձգձգվում, գուցե նախաձեռնությանը դեմ մասնագետնե՞ր կան:
-Դե, մի օրվա հարց չի, պետք է պատվիրեն, գիպսոն սարքեն: Ես չգիտեմ՝ քննարկում եղել ա, թե չէ, ես գիտեմ, որ քաղաքապետարանում հարցը դրվել ա, ու սկսվել ա աշխատանքները: Դեմ մարդ չկա, որևէ էդպիսի մարդ չկա:
-Պարոն Պետրոսյան, իսկ Դուք ինչո՞վ եք զբաղված:
-Սպասում եմ հարցի լուծմանը:
-Ի՞նչ հարց:
– Դե սպասում եմ՝ երբ հերթը կհասնի ինձ:
-Հնարավո՞ր է առաջադրվեք Ավան համայնքում:
-ՉԷ, ես համամասնական ցուցակում կամ, և երկու հոգի եթե դուրս գան, ես կընտրվեմ:
-Ակնկալիքներ ունե՞ք, որ հերթը կհասնի Ձեզ:
-Իհարկե: Դա հերթով ա, երկու հոգուց հետո իմ հերթն ա:
-Պարոն Պետրոսյան, Ձեզ ՀՀԿ ցուցակի ցածր հորիզոնականներում դնելու պատճառը Ձեր տարի՞քն էր, թե՞ այլ հարցեր կային:
-Ճիշտն ասած՝ ես չգիտեմ:
-Դուք դժգոհ չէի՞ք դրանից, չէ՞ որ կուսակցության հնաբնակներից եք:
-Դե ո՞վ գոհ կլինի, եթե իրան նման ցածր տեղերում դնեն:
-Իսկ Ձեզ վստահեցրել են, որ հերքը կհասնի՞:
-Ո՞վ պիտի վստահեցնի, դե, հերթով գնում ա, էլի, վստահեցնելու բան չկա:
ՀԳ. Ինչ վերաբերում է նախկին թաղապետի արձանին, ապա հաջորդ համարում մենք ծավալուն կներկայացնենք, թե ինչ չափանիշներով են մարդիկ արժանանում հուշարձան ունենալու պատվին, և որքանով են շարքային չինովնիկները համապատասխանում այդ չափանիշներին: Այժմ նշենք միայն, որ Դավթի Պետրոսյանի արձանի տեղադրման կապակցությամբ նաև օրենսդրական խոչընդոտներ կան»:
