Վահե Ավետյանի հիշատակին քննչական գլխավոր վարչության շենքի մոտ մեկնարկեց քաղաքացիական նախաձեռնությունների ծրագրած ակցիան՝ ի հիշատակ «Հարսանքար » ռեստորանային համալիրում ծեծի ենթարկված, այնուհետև մահացած ռազմական բժիշկ Վահե Ավետյանի:
Հրապարակախոս ՀԱԿ անդամ Զառա Հովհաննիսյանը նշեց, որ այսօր Վահե Ավետյանը պետք է դառնար 33 տարեկան: Ըստ նրա՝ այսօր պետք է հիշել և հարգել նրա հիշատակը: Զարուհի Հովհաննիսյանի խոսքով քննչական մարմնի փութաջանությունը՝ կոծկել Հարսնաքարի գործը, ինչպես դա արվեց մարտի 1-ի դեպքում` նպատակին չի ծառայելու, «ակցիան որոշակի առումով իր նպատակին է ծառայել, որովհետև այսօր վերաորակվել է «Հարսնաքարի» գործով մեղադրանքը, սակայն մենք համաձայն չենք անզգուշությամբ մահվան հասցնելու հոդվածին: Նախաձեռնությունը հետամուտ է լինելու գործի քննությանը»:
Ակցիայի ընթացքում «Հարսնաքարի» գործով քննիչ ներկայացած մեկը առաջարկեց ակցիայի մասնակիցներից մի քանիսին բարձրանալ քննչական գլխավոր վարչություն և ծանոթանալ գործի նյութերին, սակայն ակտիվիստ Դավիթ Սանասարյանն այս առաջարկը հրապարակավ մերժեց` ասելով, որ նման բան իրենք չեն նախատեսել: Իր խոսքում՝ Դավիթ Սանասարյանը ևս ակցիան որոշակի առումով կայացած համարեց:
«Օրենքի խախտումներով գործի նյութերը Վահե Ավետյանի իրավահաջորդ հոր փաստաբաններին չէին տրամադրում, սակայն այժմ այդ նյութերը փաստաբանների մոտ են, և նրանք ծանոթանում են դրանց»:
Այս պահին ակցիան շարունակվում է, և ակցիայի մասնակիցները սպասում են Վահե Ավետյանի հոր փաստաբաններին:
