Փոխնախարարներն ու փոխմարզպետներն իրենք իրենց կամքով են հրաժարական ներկայացրել: Այս մասին «Առաջին լրատվական»-ի հետ զրույցում ասաց ԲՀԿ մամլո խոսնակ Տիգրան Ուրիխանյանը` անդրադառնալով ԲՀԿ-ական պաշտոնյաների պաշտոնանկություններին:
Հարցին, թե ինչ է նշանակում տեղի ունացածը, պատասխանեց, որ իրենք իրենց կամքով հրաժարական են ներկայացրել: « Իրենք են հրաժարականի դիմում ներկայացրել և բացատրությունները կան օրերս տարածված հաղորդագրության մեջ»,- եզրափակեց իր խոսքը Տիգրան Ուրիխանյանը:
Հիշեցնենք, որ նախապես տարածված հայտարարության համաձայն` 2012 թվականի մայիսի 6-ի խորհրդարանական ընտրություններից հետո «Բարգավաճ Հայաստան» կուսակցությունը քաղաքական որոշում կայացրեց չմասնակցել կոալիցիոն կառավարության ձևավորմանը: Հայտարարության տակ ստորագրել են ԱԻ փոխնախարար Ռոմիկ Տիգրանյանը, ՏԿ փոխնախարար Ռուբեն Սինոյանը, Գյուղատնտեսության փոխնախարար Վարդան Կարապետյանը, Լոռու փոխմարզպետ Էդիկ Կարախանյանը, Արագածոտնի փոխմարզպետ Մանաֆաս Առաքելյանը: Այսօր աշխատանքից ազատվել են ՏԿ փոխնախարար Ռուբեն Սինոյանը և Արագածոտնի փոխմարզպետ Մանաֆաս Առաքելյանը:
