Իսպանական մամուլի հաղորդմամբ՝ կատալոնական ակումբի նախկին նախագահ Ժուան Գասպարն իր դիրքորոշումն է հայտնել «Բարսելոնա»-«Էսպանյոլ» սուպերգավաթային խաղի վերաբերյալ:
Հիշեցնենք, որ «Էսպանյոլ»-ը հուլիսի 31-ին հրաժարվել է մասնակցել կատալոնական մյուս ակումբի՝ «Բարսելոնա»-ի հետ սուպերգավաթային խաղին: Պատճառները մի քանիսն են՝ «Էսպանյոլ»-ը չի ուզում հիմնական կազմի խաղացողներին դաշտ մտցնել, նաև չի հանդուրժում Կատալոնիայի ֆուտբոլի ֆեդերացիայի անարգանքը:
«Եթե նրանք չեն ուզում խաղալ սեպտեմբերի 26-ին, թող չխաղան: Եթե խաղը չկայանա, ապա մեղավոր է լինելու ավելի շատ «Էսպանյոլ»-ը, քան «Բարսելոնա»-ն: Եթե մենք նայենք մարզական տեսանկյունից, ապա «Էսպանյոլ»-ը «Բարսա»-ի համար մրցակից չէ: Իհարկե չեմ ուզում ասել, թե ապագայում այս ակումբը չի կարող գերազանցել «Կապտանռնագույններ»-ին: Իմ ասածը վերաբերում է այս պահին: «Էսպանյոլ»-ի ղեկավարությանը հաճույք է պատճառում «Բարսելոնա»-ին դեմ լինելը: Եթե դա նրանք չեն անում դաշտում, ապա գրասենյակներում դրանով են զբաղված: Նրանք անգամ խնդիրներ են ստեղծում այնտեղ, որտեղ չկան»,- ասել է Գասպարը:
