ՖրանսիականTotal նավթային ընկերությունը հերթական արտասահմանյան կառույցն է, որը պայմանագիր է ստորագրել իրաքյան Քրդստանում նավթի վերամշակման համար: Այդ մասին հաղորդում է AFP-ն:
Ֆրանսիական ըներությունը գնել է Marathon Oil ընկերությանը պատկանող Հարիր և Սաֆեն հատվածի բաժնետոմսերի 35 %-ը: Այս որոշումը կարող է Իրաքի իշխանությունների հետ կոնֆլիկտի պատճառ դառնալ, քանի որ վերջիններս անօրինական են համարում նավթահանման վերաբերյալ քրդերի հետ կնքած ցանկացած պայմանագիր, որը շրջանցում է կենտրոնական կառավարությանը:
Մեկ շաբաթ առաջ Բաղդադը «սև ցուցակում» էր ներառել ամերիկյան Chevron ընկերությանը ` նրան զրկելով Իրաքի մնացած տարածքում գործունեություն ծավալելու իրավունքից:
Ավելի վաղ Chevron-ը հնդկական Reliance Industries ընկերությունից գնել էր Քրդստանի Էրբիլ քաղաքի մոտ գտնվող նավթային երկու նախագծերի 80 %-ը: 2011 թ. նույն կերպ է վարվել աշխարհի խոշորագույն ընկերություններից մեկը`Exxon Mobil-ը, որի նկատմամբ ևս Բաղդադը կիրառել է նմանատիպ պատժամիջոցներ:
Քրդական և իրաքյան իշխանություններն անընդհատ վիճում են Քրդստանի հետ նավթարդյունաբերողների կնքած պայմանագրերի օրինական լինելու հարցի շուրջ: Իրաքում առանձին նահանգ համարվող Քրդստանն արդեն պայմանագիր է ստորագրել 40 էներգետիկ ոչ խոշոր ընկերությունների հետ: Միայն վերջին ամսում է , որ խոշորագույն ընկերությունները հետաքրքրված են Քրդստանի նախագծերով:
Նավթի հետազոտման և նավթահանման պայամանգրերին իրաքյան կառավարությունն սկսել է ուշադրություն դարձնել Սադամ Հուսեյնի իշխանության տապալումից հետո: Նահանգներին արգելված էր նավթարդյունաբերողների հետ ինքնուրույն պայմանգրեր կնքելը:
Իրաքի կազմի մեջ մտնող Քրդստանն ունի ինքնավար մարզի կարգավիճակ: Քրդստանը մի շարք հարցերի` այդ թվում և նավթի արտահանումից ստացված եկամտի շուրջ, համաձայն չէ Բաղդադի հետ: Ապրիլից սկսած՝ Քրդստանը դադարել է նավթի արտահանումը ողջ Իրաքի տարածքով` հայտարարելով, որ կառավարությունը չի վճարել մինչ այդ տրամադրած էներգոռեսուրսի համար:
