ՀՀ մարդու իրավունքների պաշտպանի գրասենյակում ԵԱՀԿ հայաստանյան գրասենյակի հետ համատեղ հրավիրած քննարկմանը, որը նվիրված էր զինված ուժերում քաղաքացիական վերահսկողությանը, մասնակցում էր նաեւ Հելսինկյան քաղաքացիական ասամբլեայի Վանաձորի գրասենյակի ղեկավար, իրավապաշտպան Արթուր Սաքունցը: «1in.am»-ին հետաքրքրում էր իրավապաշտպանի կարծիքը քննարկման մասին: «Մարդու իրավունքների պաշտպանի արձագանքը համարժեք չէ Հայաստանի զինված ուժերում այսօր տիրող վիճակին: Քննարկման ժամանակ որեւէ անդրադարձ չեղավ զինված ուժերում վերջին ամիսներին տեղի ունեցած սպանություններին, մահացություններին, այդ դեպքերի բացահայտման հավանականությանը: Սրանից զատ՝ չկան հստակ ձեւակերպված պահանջներ բանակում տիրող ոչ կանոնադրական հարաբերությունների մասին: Սա, կարծում եմ, հերթապահ հաշվետվություն էր»,- ասաց Արթուր Սաքունցը: