«ժողովուրդ»-ին հասած տեղեկությունների համաձայն՝ վերջին օրերին Գյումրու քաղաքապետ Վարդան Ղուկասյանը սկսել է իր մոտ կանչել քաղաքապետարանին ենթակա կառույցների աշխատակիցներին և հրահանգել գրանցվել «Ֆեյսբուք»-ում՝ մասնակցելու այնտեղ կազմակերպված քվեարկություններին:
«Սակայն Վ. Դուկասյանի մամլո խոսնակ Լիլիթ Աղեկյանը մեզ հետ զրույցում հերքեց տեղեկությունը՝ասելով «էդ ի՞նչ բան է, էդ ինչ բամբասանք է: Դա մեր աշխատաոճը չէ և չի համապատասխանում իրականությանը: Մարդիկ կան, որ ուզում են ինտրիգա ստեղծել ու տալիս են մեր անունը: Կրկնում եմ՝ դա մեր ոճը չէ»:
Հավելենք, որ թեև հանգստյան օրերին ընթացող քվեարկություններում առաջատարը եղել է ԲՀԿ անդամ, բայց «ճակատագրով» ՕԵԿ-ական Սամվել Բալասանյանը, այնուամենայնիվ Վարդանիկը շարունակում է «Ֆեյսբուք», «Օդնոկլասսնիկի», 1001 ցօlօs.ru կայքերի միջոցով փորձել ցույց տալ իշխանություններին, թե իր վարկանիշը բարձր է: Ավելին, ի հեճուկս խոսնակի հերքումների, ըստ «ժողովուրդ»-ի տեղեկությունների, այս օրերին ֆեյսբուքյան իրական և կեղծ հաշիվներ են բացում նույնիսկ Վ. Դուկասյանի թիկնազորի անդամները, ինչն էլ առաջացրել է գյումրեցիների ծիծաղը: Մեզ հետ զրույցում նրանցից մեկն իրենց հատուկ ոճով կատակեց. «Վարդանիկի ախրանեն արդեն կըսե, թե մեր զենքը կամպյուտրի մգնիգն է»:
