Սեպտեմբերի 9-ին կայանալիք Գյումրու քաղաքապետի ընտրություններում ՀՅԴ-ն հանդես կգա առանձին թեկնածուով: Այս մասին, այսօր հրավիրված մամլո ասուլիսի ժամանակ հայտարարել է կուսակցության մարզային կառույցի պատասխանատու Գեւորգ Ալեքյանը: «Մենք թվով 11 համայնքներում առաջադրելու ենք թեկնածուներ , որից մեկը անկուսակցական է, մենք սատարելու ենք նրան»,-նշեց Գեւորգ Ալեքյանը:
Գյումրու քաղաքապետի ընտրություններում Դաշնակցությունը առաջադրելու է Շիրակի մարզպետարանի ֆինանսատնտեսական վարչության պետի տեղակալ Հովսեփ Սիմոնյանի թեկնածությունը: Հարկ է նշել, որ մարզպետարանի աշխատակիցը մեկ անգամ էլ էր փորձել դառնալ քաղաքապետ: 2005 թվականին կայացած ՏԻՄ ընտրություններում Հովսեփ Սիմոնյանը առաջադրել էր իր թեկնածությունը, սակայն շուտով ինքնաբացարկ էր հայտնել: 2005 թվականին ընտրապայքարից դուրս գալու իր որոշումը ՀՅԴ անդամն այսպես մեկնաբանեց. «Դուք պետք է հիշեք, թե ինչպիսին էր մթնոլորտը այդժամանակ, թեկնածուներն ինչ կարգավիճակ ունեին, և ես այդ ժամանակʽ որպես քաղաքի մարդ, որպես անձնավորություն, ցանկություն չունեցա այդ մթնոլորտում շարունակել իմ պայքարը»: Ինչպիսի ընտրություններ կարելի է սպասել Գյումրիում և հնարավո՞ր է արդյոք առանց «դաբրոյի» ընտրվել քաղաքապետ. «Առաջին լրատվական»-ի թղթակցիայսհարցին ՀՅԴ ՇՄ կառույցի պատասխանատու Գեւորգ Ալեքյանը պատասխանեց .«Եթե հարցը վերաբերում է դաբրոյին, դա մեզ մոտ անհասկանալի է, իհարկե, ժամանակը ցույց է տվել, որ իրոք կան այդպիսի բաներ: Բայց այսօր դաբրո հասկացությունը մեզ օտար է, մեզ համար ամենամեծ դաբրոն ժողովրդի տված քվեն է»,- նշեց Գեւորգ Ալեքյանը: Հավելենք, որ առայժմ Գյումրու քաղաքապետի պաշտոնում առաջադրվելու մասին հայտարարել է ԲՀԿ-ական ՍամվելԲալասանյանը: Գործող քաղաքապետ Վարդան Ղուկասյանն առայժմ չի հայտարարել, թե պատրաստվու՞մ է արդյոք 5-րդ անգամ առաջադրել իր թեկնածությունը, թե՞ ոչ:
Փայլակ Ֆահրադյան Շիրակի մարզային թղթակից
