Ադրբեջանական APA լրատվական գործակալության փոխանցմամբ՝ վերջին 10 տարիներին Ուկրաինան հանդիսացել է ռազմական տեխնիկայի առևտրի հարցում Ադրբեջանի հիմնական գործընկերներից մեկը:
ՄԱԿ-ի՝ սովորական սպառազինության մասին զեկույցում նշված է, որ 2001-2011 թվականներին Ուկրաինան Ադրբեջան է արտահանել ինչպես ծանր տեխնիկա, այնպես էլ հրթիռային համակարգեր, ավիացիոն տեխնիկա և թեթև հրաձգային զենք:
Հաշվետու ժամանակաշրջանում Ուկրաինան Ադրբեջանին վաճառել է 28 ինքնաթիռ՝ 12 Л-39 և 16 МиГ-29, 12 Ми-24 մարտական ուղղաթիռ, որով և մեծ դեր է խաղացել Ադրբեջանի ռազմական ավիապարկի թարմացման մեջ:
Միևնույն ժամանակահատվածում Ուկրաինան Ադրբեջանին վաճառել է Т-72 տիպի 48 տանկ, 2 հետևակի մարտական մեքենա (БМП-1), 157 զրահատրանսպորտ (150 հատ БТР-70, 3 հատ БТР-3У, 4 հատ БТС-5Б): Վաճառվել է նաև 70 ինքնագնաց հաուբից (16 հատ Акация 2С3, 54 հատ Гвоздика 2С1), 12 հատ Смерч 9Ф52 համակարգ, 85 հատ ПМ-38 ականանետ և 55 հատ Д-30А հաուբիցներ: 72 հաուբիցի տիպն էլ չի նշվում:
Այս ամենի հետ մեկտեղ, Ուկրաինան Ադրբեջանին վաճառել է հրթիռային տարբեր համակարգեր: Դրանց թվում են նաև Точка-У հրթիռային արձակման 3 սարքեր, Р-27 տիպի 64 հրթիռներ, Стрела 9М36-1 տիպի 18 հրթիռներ, Стрела 9П58М տիպի 10 արձակման սարքեր, 6 հակատանկային ղեկավարվող հրթիռային համալիրներ:
