Լոնդոնի 2012թ. ամառային Օլիմպիական խաղերի երկրորդ օրը` հուլիսի 29-ին, խաղարկվել է տիտղոսների 14 հավաքածու: Չինաստանի, Հյուսիսային Կորեայի, Ֆրանսիայի և ԱՄՆ-ի հավաքականները նվաճել են 2-ական ոսկե մեդալ: Իսկ 1-ական օլիմպիական ոսկի իրենց ակտիվում գրանցել են Վրաստանի, Հոլանդիայի, Հարավային Կորեայի, Հարավաֆրիկյան Հանրապետության, Ղազախստանի և Հունգարիայի մարզիկները:
Օլիմպիադայի 2-րդ օրը Հայաստանը ներկայացնում էր 66 կգ քաշային կարգում հանդես եկող ձյուդոիստ Արմեն Նազարյանը, ով պարտություն կրեց 1/8 եզրափակչում: Այսպիսով` Հայաստանի ձյուդոիստներին չհաջողվեց օլիմպիական ոսկի պարգևել հայ մարզասերներին: Իսկ Հայաստանը ներկայացնող լողորդուհի Անահիտ Բարսեղյանը զբաղեցրել է նախավերջին հորիզոնականը` 100մ թիկնալողում:
Օլիմպիական խաղերի երկրորդ օրվա արդյունքներով` նվաճած մեդալների քանակով առաջատարը Չինաստանի օլիմպիականներն են, Ռուսաստանի հավաքականը զբաղեցնում է 11-րդ տեղը, իսկ Ուկրաինայի մարզիկները` 22-րդ:
Այսօր` հուլիսի 30-ին, Լոնդոնի Օլիմպիական խաղերի 3-րդ օրը, կխաղարկվի մեդալների 12 հավաքածու: Հայաստանի օլիմպիական հավաքականը ներկայացուցիչ չունի: