ՌԴ ԱԳ փոխնախարար, պետքարտուղար Գրիգորի Կարասինի՝ նախօրեին ԱԺ խմբակցությունների հետ հանդիպման ժամանակ ուշագրավ փաստ է գրանցվել: Թեև ըստ արարողակարգի Կարասինը նախատեսել է հանդիպել ԱԺ խմբակցությունների, այսինքն՝ պատգամավորների հետ, սակայն ՕԵԿ խմբակցությունից հանդիպմանը, բացի Հեղինե Բիշարյանից ու Հովհաննես Մարգարյանից, ներկա է եղել նաև Մհեր Շահգելդյանը: Իսկ Շահգելդյանը, ինչպես հայտնի է, ԱԺ պատգամավոր չէ: Սակայն դա չէր խանգարել, որ Մհեր Շահգելլդյանը ոչ միայն մասնակցեր Կարասինի հետ հանդիպմանը, այլև նստեր հենց կենտրոնում՝ Հեղինե Բիշարյանի ու Հովհաննես Մարգարյանի կողքին:
Մեր աղբյուրների կարծիքով, Մհեր Շահգելդյանին այդ հանդիպմանը հատուկ են բերել, քանի որ Բիշարյանն ու Մարգարյանը չգիտեն ռուսերեն, և Մհեր Շահգելդյանը պետք է նրանց օգներ Կարասինի հետ հաղորդակցվելիս:
Ի դեպ, ուշագրավն այն է, որ այն բանից հետո, երբ Շահգելդյանին ՕԵԿ-ը ետ կանչեց արտակարգ իրավիճակների նախարարի պաշտոնից՝ իբր ներկուսակցական աշխատանքներով զբաղվելու համար, վերջինս չէր երևում ոչ մի տեղ՝ ո՛չ հարցազրույցներ էր տալիս, ո՛չ էլ ասուլիսների մասնակցում: