Western Union-ի Հարավային Եվրոպայի և ԱՊՀ-ի գծով փոխնախագահ Ջոնաթան Կլաուսն ասել է, որ ընկերությունը չի պատրաստվում միջամտել Հայաստանի և Ադրբեջանի պետական, քաղաքական կամ դիվանագիտական հարաբերություններին, տեղեկացնում է abc.az կայքը:
«Ընկերությունը, որ ես ներկայացնում եմ, ապօրինի գործունեություն չի իրականացնում, և ներկայումս մենք աշխատանքներ ենք տանում Հայաստանի հետ համագործակցությունը վերականգնելու համար: Կարծում ենք` կգա այն օրը, որ Հայաստանի կենտրոնական բանկը պայմաններ կստեղծի, որ մենք գործունեություն ծավալենք իրենց տարածքում»,- ասել է Կլաուսը:
Նա շեշտել է, որ կազմակերպությունը ինտենսիվորեն համագործակցում է նաև Ադրբեջանի կենտրոնական բանկի հետ:
«Ադրբեջանի կենտրոնական բանկի հետ կնքված պայմանագիրը նախատեսում է ծառայություններ մատուցել Ադրբեջանի իշխանությունների վերահսկողության տակ գտնվող տարածքներում: Բոլորին հայտնի է, որ մենք ծառայություններ ենք մատուցել Ադրբեջանի և Հայաստանի տարածքում, ինչպես նաև որոշ մարզերում: Մենք ենթարկվում ենք այն երկրների օրենսդրությանը, որտեղ գործում ենք»,- ասել է Կլաուսը: