«Առաջին լրատվական»-ի զրուցակիցն է «Ժողովրդավարական հայրենիք» կուսակցության առաջնորդ Պետրոս Մակեյանը:
– Պարոʼն Մակեյան, ի՞նչ փուլում է «Ժողովրդավարական հայրենիք» կուսակցության երևանյան գրասենյակի տարածքի վեճը:
– Անցած տարի լրացավ տարածքի վարձակալության ժամկետը, և Պետական գույքի կառավարման վարչությունը հրաժարվեց վերակնքել պայմանագիրը` պատճառաբանելով, թե նպատակահարմար չի գտնում: Շաբաթներ առաջ ազատեցինք տարածքը` խուսափելով դատական ակտերի հարկադիր կատարողի հետ շփումից:
– Տարածք տրամադրելու խնդրանքով վերջին անգամ Պետգույքի կառավարման վարչությանը դիմել էր ՀԱԿ-ի խորհրդարանական խմբակցության ղեկավար Լևոն Զուրաբյանը` դիմումում շեշտելով, որ «Ժողովրդավարական հայրենիք»-ն արդեն խորհրդարանական կուսակցություն է և առաջնահերթություն ունիʽ ըստ Կուսակցությունների մասին օրենքի: Որևէ պատասխան ստացե՞լ եք:
– Վարչապետ կոչեցյալըʽ այդ «տաղանդավոր» տնտեսագետը, ով Ռոբերտ Քոչարյանի հետ բանկային հայտնի գործարքով սնանկացրեց տեղական արտադրողներին և երկուսով գրպանեցին ներդնողների փողերը, գործը պաս է տալիս Գալուստի տղա Արմանին, ով Պետական գույքի կառավարման վարչության պետն է: Նրա պատասխանն էլ հետևյալն է` առաջարկել էր տեղափոխվել Արմավիր կամ Գառնի:
– Բայց, Պարոʼն Մակեյան, ի վերջո խոսքը խաղատան մասին չէ, այլ կուսակցության գրասենյակի: Ինչո՞ւ են քաղաքից քշում:
– Նրանք մեր կուսակցությունը լավագույն դեպքում խաղատան տեղ կօգտագործեին, որովհետև արդեն 15 տարի է` մենք լուրջ խնդիր ենք նրանց համար: Մենք ասում ենք, որ այս երկրի հիմնական խնդիրն այս վարչախումբն է, ուստի լավ կլինի, որ իրենք գնան մարզեր և ազատեն զբաղեցրած տարածքը: Հիմա գնդակը, հայ-թուրքական դիվանագիտական լեզվով ասած, իրենց դարպասում է: Մենք կսպասենք մինչև սեպտեմբեր: Դեռ ժամանակ ունեն: Թող մտածեն:
– Պարոʼն Մակեյան, ՀԱԿ-ից կուսակցություններ, առանձին քաղաքական գործիչներ զատվեցին: Հավանականություն կա՞, որ Դուք` Ձեր կուսակցությամբ, կարող եք լքել ՀԱԿ-ը:
-Գիտեք, դա վատթարագույն տարբերակն է: Մի անգամ եղել է, որ 19 անդամներից ձևավորված մեր քաղխորհուրդն այլ տեսակետ է ունեցել, անձամբ ես` այլ տեսակետ: Բայց դուրս գալու հարցին ես դեմ եմ: Կոնգրեսի ապագան 2013-ի նախագահական ընտրություններից է կախված: Ու Կոնգրեսի առաջնորդը, քաղխորհուրդը և մյուս անդամները պետք է հասկանան, որ այս պահը պետք է ճիշտ օգտագործենք: Եվ Կոնգրեսից դուրս գալը այս հարցում չի օգնում: Որովհետև հաղթանակի հասնելու համար, այս ռեժիմից ազատվելու համար այլ հնարավորություն չի լինելու:
– Իսկ ՀԱԿ-ը լքողների ներկայացրած փաստարկներն չե՞ն արդարացնում իրենց գործողությունները:
– Մեր կուսակցությունը հրապարակայնացրել է իր տեսակետը թեʼ իշխանությունների հետ երկխոսության, թեʼ ԲՀԿ-ի հետ համագործակցելու, թեʼ խորհրդարանական ընտրությունների մասին:
– Դուք ի՞նչ եք մտածում ՀԱԿ-ԲՀԿ ռևերանսների մասին: Լևոն Տեր-Պետրոսյանի ելույթը հիմնականում կառուցված էր ՀԱԿ-ԲՀԿ համագործակցության մեսիջի վրա: Արդյո՞ք Ձեր կուսակցությունն այս հարցում վտանգ չի տեսնում:
– ՀԱԿ-ԲՀԿ համագործակցության հնարավորության մասին կուսակցությունը ներկայացրել է իր տեսակետը` ինչ է շահում Կոնգրեսը, կամ ինչ է կորցնում, ինչ դերակատարում կարող ենք ունենալ նախագահական ընտրություններին ԲՀԿ-ի հետ համագործակցելու դեպքում: Քաղաքական որոշ գործիչներ պնդում են, թե առաջնորդը` Լևոն Տեր-Պետրոսյանը, մի բան գիտի: Ես ընդունում եմ: Այոʼ, գուցե նա շատ բան գիտի: Բայց, փաստացի, ԱԺ ընտրություններին Կոնգրեսն արձանագրեց ընդամենը 7 տոկոսի արդյունքներ, իսկ ես չեմ կարծում, թե Կոնգրեսը 7 տոկոսի վարկանիշ ուներ: Ես հասկանում եմ, որ դա ընտրություն չէր, այլ փողի, սանձարձակության, զոռբայության, ցինիզմի գործելաոճ էր: Բայց, այնուամենայնիվ, եղավ այն, ինչ եղավ, և այդ 7 տոկոսը Լևոն Տեր-Պետրոսյանի` «ինչ-որ բան իմանալու» հետևանքն էր: Ու թե էլ ինչ գիտի Լևոն Տեր-Պետրոսյանը, ես չգիտեմ:
– Դուք կուսակցության առաջնորդ եք: ՀԱԿ-ի կայացրած որոշումներում ունե՞ք Ձեր ձայնի իրավունքը: «Ժողովրդավարական հայրենիք» կուսակցությունը որքանո՞վ է մասնակցում որոշումների կայացման գործընթացին:
– Մեր կուսակցության փոխնախագահ Ղուկաս Մեհրաբյանն էր մասնակցում քաղխորհրդի նիստերին` մինչև նոյեմբեր ամիսը: Հաշվի առնելով այն հանգամանքը, որ առջևում խորհրդարանական ընտրություններ էին, և քաղաքական ակտիվ գործընթացների ժամանական էʽ մեր կուսակցության քաղխորհուրդը որոշեց, որ կուսակցությունն առաջին դեմքով պիտի մասնակցի ՀԱԿ քաղխորհրդի նիստերին: Դեկտեմբերից ես էի մասնակցում ՀԱԿ քաղխորհրդի նիստերին: Կոնգրեսի քաղխորհրդում բոլոր հարցերը քննարկվում են: Բայց, ցավոք սրտի, որոշման քվոտան ճնշվում է քաղխորհրդի մեծամասնության կողմից, ինչպես եղավ ԱԺ ընտրությունների ցուցակները կազմելու ժամանակ, ու երբ որոշումը չի ընդունվում, այդ հարցի լուծումը փոխանցվում է Կոնգրեսի առաջնորդին: Սա է իրական վիճակը:
– Այսինքն, ցենտրալիզմի սկզբունքն ամենևին էլ դեմոկրատիայի նշան չէ՞ Կոնգրեսի դեպքում:
– Արտաքուստ, քննարկումների ժամանակ ժողովրդավարության ցենզը` որպես շղարշ, պահվում է: Բայց երբ գալիս է որոշումներ ընդունելու և կոնսեսուսի պահը, միշտ մի կուսակցություն գտնվում է, որ այլ կարծիք է ունենում, իսկ թե ինչ է լինում հետո, ասացի: Նույն ցուցակները կազմելու համար ամիս ու կես բուռն քննարկումներ եղան: Բայց վերջում կոնսեսուսի չեկան, ու ցուցակը կազմեց մեկ մարդ: Իսկ ցուցակի որակն ու հետևանքները հայտնի են բոլորին:
– Պարոʼն Մակեյան, «Ժողովրդավարական հայրենիք» կուսակցությունը ԲՀԿ համագործակցությանը դեմ արտահայտվող ուժերից էր: ՀԱԿ քաղխորհրդի նիստում քննարկումներ եղա՞ն այս կապակցությամբ:
– Քաղխորհրդի նիստում բազմաթիվ քննարկումներ են եղել, նաև` առանձնազրույցներ են եղել, հրապարակումներ: Այսինքն, բոլոր հարթություններում մենք ներկայացրել ենք մեր տեսակետը:
– Որքանո՞վ Ձեր ձայնը լսելի եղավ:
– Մեր երկրի չարիքը օլիգարխիան է ու կրիմինալ տարրը: Եթե աշխարհի այլ երկրների մեծահարուստներ լռում են առաջին միլիոնը աշխատելու մեթոդների մասին, սրանց դեպքում առաջինից մինչև վերջին միլիոնը աշխատում են հանցագործ ճանապարհով:
– Գագիկ Ծառուկյանը օլիգա՞րխ է, թե՞ ոչ: Քրեական տա՞րր է, թե՞ ոչ:
– Նա իր միլիարդները կուտակել է հարկեր չվճարելով` սա հանցագործ չէ՞: Նրա սափրագլուխների բանդաներն անցնում են մարդկանց վրայով` սա կրիմինալ չէ՞: Բոլոր մյուս լկտիություններն անում է` կրիմինալ չէ՞: Գագիկ Ծառուկյանը թիվ 1 օլիգարխն է` ոնց ուզում եք հաշվեք: Ես շատերին եմ ճանաչում, ովքեր ինչ-ինչ հանգամանքներից ելնելով` այդ կուսակցության շարքերում են այսօր: Հիմա բոլորին չեմ քննադատելու: Բայց թող նրանք գան ու հրապարակավ ներկայացնեն իրենց մեղքերը, թող հրաժարվեն կեղծ «բարեգործությունից», որովհետև նրանք ժողովրդից թալանածի փշրանքներն են նետում նույն այդ ժողովրդին, անունն էլ դնում` բարեգործություն: Այս դեպքում ընդդիմությունը թող համագործակցի: Բայց որ նախագահական ընտրություններին համագործակցության մեջ ԲՀԿ-ն դառնա առաջատարը, քաղաքական գծի հիմնական թելադրողը, իսկ Կոնգրեսն էլ սպասարկի նրանց, սա արդեն անամոթություն է դուրս է գալիս:
– ԲՀԿ-ն, ըստ էության, Ռոբերտ Քոչարյանի նախագիծն է, որպեսզի օլիգարխները բաժնետոմսեր ունենան նաև քաղաքականության մեջ: Լևոն Տեր-Պետրոսյանի նման փորձառու քաղաքական գործիչը չի՞ նկատում, որ այս համագործակցությամբ ջուր է լցնում Քոչարյանի ջրաղացին:
– Ես կարծում եմ, որ ցայսօր էլ գործում է Քոչարյան-Սարգսյան տանդեմը, և այսօր այդ տանդեմին ձեռնտու է, որ Ծառուկյանին ներկայացնեն որպես ընդդիմադիր գործիչ` այդպիսով փոշիացնելով իրական ընդդիմադիր զանգվածի ձայներն ու գործողություններ նախաձեռնելու հնարավորությունները: Իսկ Լևոն Տեր-Պետրոսյանը, գուցե, մտածում է, թե լուրջ առճակատումներ կան ԲՀԿ-ի և ՀՀԿ-ի միջև: Սրան անձամբ ես չեմ հավատում, որովհետև եթե լուրջ առճակատումներ կան, ապա ինչպե՞ս է պատահում, որ Սամվել Բալասանյանին նույն ՀՀԿ-ն Գյումրիի քաղաքապետ է դարձնում: Կամ ինչպե՞ս է պատահում, որ Սպորտի և երիտասարդության նախարարը ԲՀԿ-ից է: Կամ ինչպե՞ս է, որ Գագիկ Ծառուկյանը Օլիմպիական կոմիտեի նախագահն է: 1998-ին, երբ «Ժողովրդավարական հայրենիք» կուսակցությունը հայտարարեց իր ընդդիմադիր լինելու մասին, Օլիմպիական կոմիտեի նախագահն այդ ժամանակ մեր կուսակից Ալեքսան Ավետիսյանն էր: Հաշված օրերի ընթացքում Ալեքսան Ավետիսյանին հեռացրին այդ պաշտոնից: Այդ ինչպես է լինում, որ Գագիկ Ծառուկյանը շարունակում է պաշտոնավարել: Բայց չէ՞ որ Հայաստանում ցանկացած մեկին կարող են հաշված օրերի ընթացքում ոչնչացնել, եթե պետք է լինում: Մանավանդ, որ Գագիկ Ծառուկյանն այնքան խոցելի է իրականում:
