Սիրիայի կառավարական ուժերը Հալեպը գրոհայիններից մաքրելու օպերացիա են իրականացնում: Սիրիայում զինված հակամարտության օջախը տեղափոխվել է երկրի` մեծությամբ երկրորդ քաղաք` Հալեպ, որը գտնվում է Դամասկոսից 355 կմ հյուսիս: Հակամարտության մեկնարկից երկար ժամանակ անց քաղաքում համեմատաբար հանգստություն է տիրել: Այս մասին գրում է Itar-Tass-ը:
Սիրիայի Ազգային խորհրդի ներկայացուցիչները չորեքշաբթի հայտարարել են, որ զինված ընդդիմադիրների ձեռքում են գտնվում Հալեպի առնվազն 10 թաղամասեր կամ Սիրիայի տնտեսական մայրաքաղաքի տարածքի 50 տոկոսը: Միևնույն ժամանակ սիրիական հեռուստատեսությունը հաղորդում է, որ քաղաք ներխուժած բանակը բարեհաջող կերպով հետապնդում է գրոհայիններին, մի քանի տասնյակը սպանվել են, ոմանք վայր դրել զենքն ու հանձնվել:
Դաշտային հրամանատարները հաստատում են, որ Սիրիայի ռազմաօդային ուժերի ուղղաթիռները հարվածներ են հասցրել Հալեպի արևելյան հատվածին, որտեղ վերջին օրերին այլ շրջաններից հարյուրավոր գրահայիններ են եկել: Քաղաքի կենտրոնում և արևմտյան հատվածում, որտեղ իշխում են կառավարական ուժերը, տանկեր են հայտնվել: Զրահատեխնիկան բոլոր կողմերից փակել է մուտքը Սադալա ալ-Ջաբիրի հրապարակ, որտեղ տեղակայված են հիմնական պետհաստատությունները: Այսօր կառավարական ուժերը պատրաստվում են զանգվածային գրոհով քաղաքն ամբողջությամբ հետ գրավել:
Դիմադրության օջախների ճնշման օպերացիաներ են իրականացվում նաև հարևան Համայում:
Նշենք, որ Սաուդյան Արաբիա փախած գեներալ-լեյտենանտ Մանաֆ Տլասը, որը Սիրիայի պաշտպանության նախկին նախարարի որդին է, հայտարարել է, որ պատրաստ է հանդես գալ երկիրը միավորողի դերում: «Աշ-Շարկ ալ-Աուսատ» թերթին տված հարցազրույցում նա ասել է, որ մշակում է երկիրը ճգնաժամից դուրս բերելու ճանապարհային քարտեզ:
