«Դա ուղղակի խայտառակություն է: Գնահատականը երևի հանրությունը պետք է տա: Սա ցույց է տալիս, որ իրենք իրենց ոչ մի խոսքում՝ կապված Մարտի 1-ի հետ, անկեղծ չեն՝ ձևական, պրոտոկոլային վերաբերմունք են դրսևորել»,- «Առաջին լրատվական»-ի հետ զրույցում ասաց Երևանի ավագանու «Ելք» խմբակցության անդամ Ալեն Սիմոնյանը՝ անդրադառնալով Երևանի ավագանու ՀՀԿ խմբակցության անդամների, այդ թվում նաև քաղաքապետի պահվածքին, որոնք «Ելք»-ի առաջարկը՝ հարգել Մարտի 1-ի զոհերի հիշատակը, անտեսեցին և ոտքի չկանգնեցին:
Նրան զարմացնում է քաղաքապետի պատասխանը, թե՝ մենք հարգել ենք. «Ամեն օր էլ պետք է հարգեք: Նայում էին Տարոն Մարգարյանին՝ տեսնելու համար Տարոն Մարգարյանը կանգնո՞ւմ է, թե՞ ոչ, որ իրենք էլ կանգնեն կամ չկանգնեն»:
Նրա խոսքով՝ բոլորը գիտեն, որ ՀՀԿ-ն՝ որպես իշխող կուսակցություն, առնվազն պատասխանատվություն է կրում:
Մեր զրուցակիցը համոզված է, որ լղոզելով՝ որևէ բան չի փոխվելու. «Ինչպես չփոխվեց 1915 թվականին, երբ մի հսկա պետություն փորձում էր լղոզել մարդկանց սպանությունը: Սա էլ մեզ համար գենոցիդի պես մի բան է, երբ Երևանի կենտրոնում ուղղակի մարդկանց գնդակահարեցին: Ժամանակը չի ջնջելու այս ամենը»:
Ինչ վերաբերում է «Երկիր ծիրանի»-ի նախագծին, ապա Ալեն Սիմոնյանը վստահ է, որ Մարտի 1-ը, ինչպես նաև Հոկտեմբերի 27-ը չեն կարող շահարկման թեմա դառնալ. «Կարելի էր այդ նույն նախագիծը բերել նաև առանց պատմական անձանց գնահատականներ տալու, որովհետև գնահատականը պատմությունն է տալիս, իսկ Վազգեն Սարգսյանը ազգային հերոս է»:
Ալեն Սիմոնյանը սա համարում է ոչ թե «Երկիր ծիրանի»-ի կողմից միտումնավոր արված քայլ, այլ ««Երկիր ծիրանի»-ի անդամները բավականին անփորձ են»:
Մանրամասները՝ տեսանյութում:
