Անդրադառնալով կառավարության նիստերն ապրիլի 9-ից հետո փակ անցկացնելու որոշմանը՝ արդարադատության նախարար Դավիթ Հարությունյանը նշել է, որ թափանցիկությունը բացասաբար է ազդել կառավարության որակի վրա: Միջազգային և անվտանգության հարցերի հայկական ինստիտուտի տնօրեն Ստյոպա Սաֆարյանը «Առաջին լրատվական»-ի հետ զրույցում նշեց, որ նախարարի նշած հիմնավորումները բավարար չէին. «Առաջին հերթին Դավիթ Հարությունյանը չպետք է մոռանա, որ ինքը ներկայացնում է մի իշխանություն, որը սահմանադրական փոփոխությունների ժամանակ բոլորիս խոստանում էր ավելի մեծ ժողովրդավարություն: Տվյալ պարագայում մենք առայժմ տեսնում ենք ժողովրդավարական պրոցեսի սահմանափակում՝ այն էլ անհեթեթ հիմնավորումներով՝ հղում կատարելով միջազգային պրակտիկայի վրա, որը, անշուշտ, միասնական և միատեսակ չէ, հղում կատարելով կառավարության արդյունավետության վրա, հղում կատարելով կառավարության կաշկանդվածության վրա: Հանրության մեղքը չէ, որ Դավիթ Հարությունյանը ներկայացնում է մի կառավարություն, որը կաշկանդված չէ կամ որի անդամները պատրաստ չեն հանրության առջև թափանցիկ և հրապարակային զրուցել, բանավիճել»,- ասաց Ստյոպա Սաֆարյանը:
«Ես վերին աստիճանի զգուշանում եմ որպես քաղաքացի և որպես փորձագետ՝ Դավիթ Հարությունյանի գործունեությունից: Նա պատմության մեջ ուզում է մնալ որպես հակաժողովրդավարական, հակաժողովրդական օրինագծեր անհեթեթ հիմնավորումներով անցկացնելու մեծագույն վարպետ»,- հավելեց նա:
Ամբողջությամբ՝ տեսանյութում: