«Ծառուկյան» դաշինքը ՀՀԿ կոալիցիոն գործընկեր ՀՅԴ-ին առաջարկում է միանալ այսպես կոչված ռեյտինգային ընտրակարգը չեղարկելու օրենսդրական նախաձեռնությանը: Տրամաբանությունը հուշում է, որ ՀՅԴ համար դա պետք է լինի ընդունելի նախաձեռնություն, քանի որ Դաշնակցությունն ինքն էլ մտահոգություն էր արտահայտել դրա կապակցությամբ: Այստեղ սակայն խնդիրն այն է, որ ընտրակարգի վերաբերյալ մոտեցումները Հայաստանում ձևավորվում են ոչ թե ըստ այսպես ասած գաղափարական կամ հայեցակարգային մոտեցումների, այլ ըստ քաղաքական նպատակահարմարության: Ըստ այդմ, Հայաստանում քանի դեռ ձևավորված չէ նոր քաղաքական իշխանությունը և պարզ չէ, թե ի վերջո ինչպիսի հարաբերակցություն ու ստատուս-քվո է լինելու ապրիլից հետո, ընտրական կարգի և կանոնների վերանայումը գործնականում բացառելի է: Դա տեղի կունենա այն բանից հետո, երբ քիչ թե շատ հստակություն կմտնի ներիշխանական ստատուս-քվոյի հարցում և ըստ այդմ պարզ կլինի, թե գերակշռող ուժը ինչպիսի տեխնոլոգիա-մեթոդաբանական ներուժ ունի հնարավորինս անաղմուկ վերարտադրություն ապահովելու համար, հատկապես ի՞նչ խաղի կանոն է առավել համարժեք ու ներդաշնակ այդ ներուժի առավելագույն օգտագործմանը: Դրանից է կախված լինելու, թե ինչ վերանայման կենթարկվի այսպես ասած ռեյտինգային համակարգը, որն իրականում ոչ միայն թաքնված՝ այն էլ վատ թաքնված մեծամասնականն է, այլ ըստ էության գերմեծամասնականը, երբ ոչ թե մեկն է հաղթում, այլ մի քանիսը, կարևորը՝ լինի վճարունակ:
Խոշոր հաշվով, սկզբունքորեն նկատելի չէ հեռանկար, երբ Հայաստանում կարող է կիրառվել այլ ընտրակարգ, քան այն, որի առանցքում փողն է և վճարունակությունը: Համենայն դեպս, ներկայումս իշխանությունը չունի այլ ռեսուրս և նույնիսկ ֆիզիկական ուժն իր կենսունակությամբ ներկայումս արդյունավետ չէ: Բանն այն է, որ անգամ որևէ նոր ստատուս-քվոյի դեպքում ակնհայտ է, որ գերակա դիրքում հայտնվողը դարձյալ լինելու է կապիտալը: Հարցը այն է, թե որ կապիտալը՝ հայաստանյան, ռուսաստանահայ, թե՞ այսպես ասած արևմտյան՝ ի դեմս նոր նախագահ Արմեն Սարգսյանի:
Միևնույն է, պայքարը ներկայումս սկզբունքորեն կապիտալի թևերի միջև է և ըստ այդմ աներկբա է, որ ինչպիսի փոփոխության էլ ենթարկվի ընտրական համակարգը կամ խաղի կանոնը 2022-ին ընդառաջ, առանցքում թերևս կշարունակի մնալ կապիտալի դերը, վճարունակության խնդիրը, որովհետև այլ ռեսուրս ներիշխանական պայքարում ներգրավված խմբերը՝ չունեն: Առավել ևս, որ մեծ հավանականությամբ անգամ ստատուս-քվոյի վերանայումը 2022-ին տեղի չի ունենա այն ծավալներով, որ խոսք լինի լիովին նոր խաղի կանոնների մասին: