«Բիզնեսը պետք է հասկանա, որ եթե բենզինը թանկացել է պայմանական ասած 5 կամ 10 տոկոսով, ապա դա դեռ չի նշանակում, որ դրա արդյունքում պետք է այլ ապրանքներ ևս 10 տոկոսով թանկանան, որովհետև ինքնարժեքում հո միայն բենզինը չի, բայց ցավոք սրտի, մեր իրականությունը մի փոքր այլ է և մենք վերավաճառք ենք իրականացնում։
Գազը թանկացել է 17 դրամով, բայց գազալցակայաններում 20-30 դրամ ավել են վաճառում, սա հերթական անգամ խոսում է այն մասին, որ տնտեսվարողը թանկ գնով ձեռք է բերում, բայց ինքն էլ իր հերթին է շատ ավելի թանկ գնով վերավաճառում՝ այն դեպքում, երբ հնարավորություն կա այդքան թանկ չվաճառելու։
Ըստ էության կարող ենք ասել, որ քայլեր չեն ձեռնարկվում այս ամենը զսպելու համար»,- «Առաջին լրատվական»-ի հետ զրույցում նշեց «Իրազեկ և պաշտպանված սպառող» ՀԿ նախագահ Բաբկեն Պիպոյանը՝ անդրադառնալով հունվարի 1-ից թանկացած սեղմված բնական գազի, բենզինի, դիզվառելիքի գնի թանկացմանը։
Հարցին՝ հնարավո՞ր է, որ մուլտիպլիկատիվ էֆեկտով սա հանգեցնի նաև այլ երթուղային տրանսպորտի, տաքսի ծառայությունների ուղեվարձի թանկացմանը, Պիպոյանը պատասխանեց․
«Չեմ կարծում, որ փոփոխության կենթարկվի․ չեմ կարծում, որ բոլոր վարորդները միաժամանակ գնան թանկացման, որովհետև եթե մի մասը թանկացնի, իսկ մյուս մասը՝ ոչ, ապա ակամայից բոլորը հետ են գալու հին գնին, որովհետև այդ թանկացումը չի բխում նաև բիզնեսի շահերից․ մինիմալ 600 դրամը եթե փոխեն, ապա ուղևորափոխադրումների քանակի անկում ենք ունենալու, ինչը բիզնեսը շատ լավ հասկանում է։
Երկրորդը, որ կարող էր գնային փոփոխություն լիներ՝ քաղաքային տրանսպորտն է․ քաղաքային տրանսպորտի ոլորտում մինչև բարեփոխումների ամբողջական փաթեթ չներդրվի, ապա չեմ կարծում, որ մինչ այդ գնային փոփոխություն լինի, բայց այն, որ 2018թ-ին այս ոլորտում ինչ-որ փոփխություններ կլինեն, դա փաստ է , բայց թերևս այս պահի դրությամբ տրանսպորտի գնի փոփխության հետ կապված որևէ բան հստակ ասել չեմ կարող»։
Մանրամասները՝ տեսանյութում։
