«Հանուն Հայաստան պետության» ճակատի անդամ Դավիթ Սանասարյանի կարծիքով՝ պետք է ադեկվատ լինել ու թույլ չտալ, որ քաոտիկ իրավիճակ ստեղծվի: «Եթե Սերժ Սարգսյանը չլինի վարչապետ, չի նշանակում, որ նրա նշանակած կերպարներն ընդունելի են։ Մարդիկ ժամանակին ուզում էին հավատալ, որ հնարավոր է՝ գեղեցիկ ժիլետներով ինչ-որ մեկը լուրջ փոփոխություններ բերի, բայց մենք այն ժամանակ էլ ասում էինք՝ հիասթափվելու եք, որովհետև այս մարդը (խմբ.-Կարեն Կարապետյանը) չի ծառայելու ժողովրդին ու ժողովրդի առջև որևէ պատասխանատվություն չունի»,- «Առաջին լրատվական»-ի հետ զրույցում ասաց Սանասարյանը։
Ինչ վերաբերում է ճակատի տարբեր գործիչների այն հայտարարություններին, որ լավ կլինի հենց Սերժ Սարգսյանը դառնա վարչապետ, որպեսզի ժողովուրդը պոռթկա, մեր զրուցակիցն ընդգծեց. «Դրանք կարծիքներ են, ճակատը չի ուզում, որ Սերժ Սարգսյանը վարչապետ դառնա։ Տրամաբանությունն այն է, որ դա ժողովրդին կջղայնացնի ու փողոց դուրս կբերի։ Բայց բնականաբար ճակատը չի ուզում Սերժ Սարգսյանին տեսնել վարչապետի պաշտոնում։ Կարծում եմ՝ ով այդ կարծիքն ասել է, նույնպես չի ուզում։ Պարզ է, թե ինչ մոտիվներով է ասել»։
Հետաքրքրվեցինք նաև՝ արդյոք համագործակցության հնարավորություն տեսնո՞ւմ են «Ելք» դաշինքի հետ, որը նախաձեռնում է թանկացումների դեմ բողոքի երթ անցկացնել։ Նշենք նաև, որ ճակատից շատ գործիչներ «Ելք» դաշինքին ժամանակին մեղադրում էին մանդատները վերցնելու ու իշխանություններին լեգիտիմացնելու մեջ: «Ես չեմ ասի, որ մանդատներ վերցնելը լեգիտիմացնել էր։ Լեգիտիմացնելը այլ հայտարարություններ էին, որ ժողովրդի վրա բարդվեց, որ տեղամասերում իբրև թե ամեն ինչ նորմալ էր։ Միտքս վերաշարադրեմ՝ ես բացառում եմ ՀՀԿ-ի հետ համագործակցությունը, չեմ բացառում այն բոլոր ուժերի հետ գործակցությունը, որոնք մեր հռչակած կետերի, նաև այլ կետերի շուրջ պայքարի դաշտ կստեղծեն։ Մեր դուռը բաց է, մենք բազմիցս ասել ենք՝ եկեք միասին նստենք մի սեղանի շուրջ, միասին պլաններ մշակենք։
«Ելք»-ի հիմնավորումն այն էր, որ իրենք առանձին ուժ են և նոր ուժ ստեղծելու կարիք չունեն։ Բաց մենք երկիրն այս վիճակից հանելու բոլոր համագործակցություններին կողմ ենք»,- ասաց ընդդիմադիր գործիչը։
Հարցազրույցն ամբողջությամբ՝ տեսանյութում: