«ՀՀ-ԵՄ համաձայնագրի կարևոր առաքելություններից մեկը տարածաշրջանային կայունությանը նպաստելն է, ինչը հնարավոր չէ, եթե համաձայնագրի լեգիտիմացումը չիրականանա ազգային խորհրդարանների կողմից: Համաձայնագիրն ունի անցումային դրույթներ և այն պետք է վավերացվի բոլոր՝ 28 անդամների կողմից»,-«Կոնրադ Ադենաուեր» հիմնադրամի՝ այսօր Երևանում կազմակերպած քննարկման ժամանակ անդրադառնալով նոյեմբերին ՀՀ-ի և ԵՄ-ի միջեւ ստորագրված Ընդլայնված եւ համապարփակ գործընկերության համաձայնագրին, ասաց ՀՀ ԱԺ արտաքին հարաբերությունների մշտական հանձնաժողովի նախագահ Արմեն Աշոտյանը:
«Վավերացումը պահանջում է ժամանակ, բայց նախ և առաջ քաղաքական կամք, որովհետև եվրոպական բյուրոկրատիան իր արդյունավետությամբ շատ փոքր տարածք է թողնում ժամանակային կտրուկ գործողությունների համար, այնինչ, համաձայնագիրը լիարժեք ուժի մեջ մտնելու համար պետք է վավերացվի ԵՄ անդամ բոլոր պետությունների կողմից: Պատկերացրեք, թե ինչ հսկայական ներուժ է խլելու այս գործընթացը, որը Վրաստանի ու Մոլդովայի պարագայում 1.5-ից 2 տարի տևեց: Կարծում եմ, որ մեր եվրոպացի գործընկերները պետք է մեզ հետ միասին արագացնեն վավերացման գործընթացը»,- նշեց Արմեն Աշոտյանը: