Վանաձորի ավագանու «Լուսավոր Հայաստան» խմբակցությունն այս օրերին քննարկում է հետագա անելիքները։ Հիշեցնենք, որ «Հայկական վերածնունդ» խմբակցությունն իր հինգ ավագանիներով դադարեցրել է բոյկոտը՝ խմբակցության ղեկավար Արկադի Փելեշյանին փոխքաղաքապետ նշանակելու դիմաց։
ԼՀԿ խմբակցության ղեկավար Քրիստ Մարուքյանը «Առաջին լրատվական»-ի հետ զրույցում ասել է, որ իրենք այժմ քննարկում են բոլոր սցենարները, այդ թվում՝ նիստերին մասնակցելը. «Մենք 4 տարի չենք պատրաստվում բոյկոտել ավագանու նիստերը։ Բայց պետք է հասկանանք՝ սպառե՞լ ենք բոլոր հնարավորությունները, թե՞ ոչ, և ի՞նչ դիրքորոշում է արտահայտում կառավարությունը մեր գրությունների վերաբերյալ։ Դրանից հետո արդեն հստակ կլինեն մեր հետագա անելիքները»,- ընդգծել է մեր զրուցակիցը։
Ի՞նչ է պատրաստվում անել Վանաձորի ավագանու մեկ այլ ընդդիմադիր խմբակցություն՝ «Բարգավաճ Հայաստան»-ն առայժմ հստակ չէ։ Այս խմբակցությունը, հիշեցնենք, ունի 3 ավագանու անդամ, իսկ դասալիք ավագանիները 4-ն էին։
«Առաջին լրատվական»-ի հետ զրույցում ԲՀԿ ներկայացուցիչ, «Ծառուկյան» դաշինքի պատգամավոր Նաիրա Զոհրաբյանն ընդգծեց. «Մենք ունեինք քաղաքական որոշում՝ չմասնակցել ոչ լեգիտիմ ավագանու աշխատանքներին, և այդ որոշումը կայացրել էինք «Լուսավոր Հայաստան»-ի մեր գործընկերների հետ քննարկելով։ Այս պահին ես իրավասություն չունեմ պատասխանել՝ «Բարգավաճ Հայաստան»-ի ավագանին իր բոյկոտը կդադարեցնի, թե ոչ, որովհետև դա քաղաքական խորհրդի քննարկման խնդիրն է։ Առաջիկայում այդ խնդիրը կրկին կքննարկենք, և ԲՀԿ Վանաձորի ավագանին՝ հիմնվելով քաղխորհրդի որոշման վրա, իր դիրքորոշումը կարտահայտի»,- ասաց տիկին Զոհրաբյանը։
Վանաձորում առկա մթնոլորտը պատգամավորը բացասական է համարում. «Պոզիտիվ ու դրական առաջընթաց ես չեմ տեսնում։ Բայց մի բան հստակ է՝ անկախ մթնոլորտից, ընդդիմությունը պետք է կարողանա իր ընդդիմության ունեցած լծակները օգտագործել, իր խոսքը պետք է կարողանա հնչեցնել, ի՞նչ կերպ՝ դա արդեն, կրկնում եմ, մեր ավագանին կառաջնորդվի կուսակցության քաղաքական խորհրդի որոշմամբ»։
Ինչ վերաբերում է վանաձորյան թնջուկի հանգուցալուծմանը, մեր զրուցակիցն ասաց. «Հիշում եք՝ տարուց ավելի փնտրում էինք, ովքեր են նրանք, որ գաղտագողի գնացին-քվեարկեցին։ «Տղամարդու» փնտրտուք էր սկսված՝ ով է այն տղամարդը, որ այդքան տղամարդկություն չի ունեցել բացահայտ կանգնել ու իր խոսքն ասել, թաքուն գնացել քվեարկել է։ Կարծում եմ՝ ամեն ինչ պարզվեց ու այդ փնտրտուքն ավարտված է»։
