Եթե մենք ԵՄ-ի հետ այս անգամ համաձայնագիրը չստորագրենք, ապա քաղաքական առումով, մեղմ ասած, ոչ միայն կոռեկտ չի լինի, այլև այն մյուս ընտանիքը՝ ԵԱՏՄ-ն, կմտածի, թե ինքն է միակ ընտանիքը, որին մենք պետք է պատկանենք, ինչը առանձնապես լավ հետևանքների չի հանգեցնի: Այս մասին «Առաջին լրատվական»-ի հետ զրույցում ասաց Հայաստանի գործատուների հանրապետական միության նախագահ Գագիկ Մակարյանը:
«Որպես փոքր տնտեսությամբ պետություն՝ Հայաստանի շուկան պիտի աշխարհը դիտի, ոչ թե կոնկրետ ինչ-որ երկրներ կամ ընտանիքներ: ԵԱՏՄ երկրների տնտեսությունները առանձնապես արագ չեն զարգանում, բոլոր տնտեսությունները կապված են միայն ՌԴ-ի տնտեսության հետ. ՌԴ-ի վիճակը լավ է, նրանք էլ մի քիչ կլավանան, կվատանա, նրանք կրկնակի կվատանան: Մենք չենք կարող մեր ճակատագիրը կապել մեկ ընտանիքի հետ, որը կառուցված է մեկ առանցքի վրա»,- շեշտեց նա:
Ըստ նրա՝ ԵԱՏՄ երկրների շողքը շատ լավ տրամադրություններ չի առաջացնում, ավտորիտար ռեժիմ ունեն, թափանցիկ չեն, միջինից ցածր որակ ունեն:
Գագիկ Մակարյանի խոսքով՝ Շրջանակային համաձայնագրի ստորագրման մասով ֆորս-մաժոր կարող է լինել, բայց ոչ՝ ԵՄ-ի կողմից: Չենք կարող ասել՝ վերջին վայրկյանին ինչ կլինի, քանի որ ՌԴ-ն նախորդ պայմանագրի բանակցությունների ժամանակ էլ էր հանգիստ, բայց տեսանք՝ ինչ եղավ:
Մանրամասները՝ տեսանյութում:
