Վրաստանի նախկին նախագահ Միխեիլ Սաակաշվիլին աշխատում է ԱՄՆ Կենտրոնական հետախուզական վարչության «լրջագույն նախագծի» շրջանակում, որը կոչված է խափանելու Ռուսաստանում 2018 թվականի ֆուտբոլի աշխարհի առաջնության անցկացումը։ Այս մասին «Նեզավիսիմայա գազետայի» հետ հարցազրույցում ասել է Վրաստանի խորհրդարանի նախկին նախագահ, «Դեմոկրատական շարժում-Միասնական Վրաստան» կուսակցության առաջնորդ Նինո Բուրջանաձեն։
«Շատերն այրվում են Ռուսաստանից ֆուտբոլի աշխարհի առաջնությունը խլելու և ՌԴ նախագահի ընտրությունների վրա ազդելու ցանկությունից։ Եվ այդ ուժերը պետք է այնպես անեն, որպեսզի Ուկրաինայում, Մոլդովայում, հավանաբար Վրաստանում Ռուսաստանի մոտ ծանր խնդիրներ առաջանան։ Սաակաշվիլին նման պլանի իրագործման համար հիանալի թեկնածու է»,-հայտարարել է Բուրջանաձեն։
Նա հավելել է, որ հստակ չգիտի, թե ինչ կարող է անել Սաակաշվիլին։ «Սակայն եթե Ուկրաինայում իրավիճակը սրվի, կսկսվեն ապակայունացնող գործընթացներ, ապա դա կանդրադառնա Ռուսաստանի վրա, որը ստիպված կլինի ձեռնարկել պատասխան գործողություններ, դիվանագիտական քայլեր, ընդունել ինչ-որ քաղաքական միջոցառումներ։ Ուկրաինայում տեղի ունեցողը ցանկացած դեպքում կազդի Ռուսաստանի վրա»,-նշել է քաղաքական գործիչը։