Վենեսուելայի նախագահ Նիկոլաս Մադուրոն խոստովանել է, որ արտաքին նմանություն է նկատում իր և Իոսիֆ Ստալինի միջև։
«Աշխարհում կան մարդիկ, ովքեր ինձ համարում են Կարիբյան տարածաշրջանի Ստալինը, և ես նման եմ։ Նայե՛ք պրոֆիլին, ես նայում եմ հայելու մեջ, և ինձ թվում է՝ նման եմ Ստալինին»,-հայտարարել է Մադուրոն VTV հեռուստաալիքի կիրակնօրյա հեռուստահաղորդման ընթացքում։
Վենեսուելայում ավելի վաղ անցկացվել են ազգային հիմնադիր ժողովի ընտրություններ, որը, ինչպես սպասվում է, կզբաղվի երկրի սահմանադրությունում փոփոխությունների նախապատրաստմամբ։ Այդ մարմնի ձևավորման նախաձեռնողը Մադուրոն է եղել։ Ընդդիմությունը չի ճանաչել ընտրությունները՝ նշելով, որ հիմնադիր ժողովի գումարումը պետք է իրականացվի հանրաքվեի միջոցով։ Այդ իրադաձությունն էլ ավելի է բորբոքել ապրիլի սկզբից ընթացող զանգվածային ցույցերը, որոնց զոհ է գնացել արդեն ավելի քան 120 մարդ։