ԱՄՆ նախագահ Դոնալդ Թրամփը պատրաստ է դադարեցնել կառավարության աշխատանքը՝ հասնելու Մեքսիկայի հետ սահմանային պատի շինարարության ֆինանսավորմանը։ Այս մասին հայտնում Associated Press գործակալությունը։
«Այսպես թե այնպես մենք կկառուցենք այդ պատը, եթե նույնիսկ ստիպված լինենք դադարեցնել սեփական կառավարության աշխատանքը»,-հայտարարել է նա՝ Արիզոնայի Ֆինիքս քաղաքում ելույթով դիմելով իր կողմնակիցներին։
Բացի այդ, նա հայտարարել է, որ ազատ առևտրի հյուսիսամերիկյան գոտու մասին համաձայնագիրը (NAFTA), ըստ ամենայնի, կդադարեցնի գոյությունը։ Հանգստյան օրերին ավարտվել է համաձայնագրի վերանայման բանակցությունների առաջին փուլը։
Մեքսիկայի հետ սահմանին պատի կառուցումը եղել է Թրամփի նախընտրական արշավի կենտրանական տարրերից մեկը։ Թրամփը պահանջում է, որ շինարարության համար վճարի Մեքսիկան, սակայն վերջինս հրաժարվել է։ Պատի գաղափարն աջակցություն չի գտել նաև Կոնգրեսում, նույնիսկ հանրապետականների շարքերում։
Կոնգրեսն այժմ պետք է համաձայնեցնի նոր միջոցառումներ՝ մինչ ընթացիկ ֆինանսական տարվա վերջ (ավարտվում է սեպտեմբերի 30-ին) կառավարության աշխատանքի ֆինանսավորման համար։
Թրամփը կարող է և ծրագրում է վետո դնել այդ հարցով ցանկացած որոշման վրա, եթե այն չնախատեսի միջոցների հատկացում պատի շինարարության համար, այդ դեպքում պետական բոլոր մարմինների աշխատանքն անորոշ ժամկետով կանգ կառնի։