Եգիպտոսի ոստիկանությունը այսօր հարցաքննել է նախօրեին Հուրգադայի հյուրանոցներից մեկի լողափում զբոսաշրջիկների վրա հարձակում իրականացրած տղամարդուն:
Ինչպես հաղորդում է Agence France Presse-ը, կարմիրծովյան լողափում հարձակում իրականացնողը խոստովանել է, որ կիսում է ԴԱԻՇ ահաբեկչական խմբավորման գաղափարախոսությունը: Նշվում է, որ ԴԱԻՇ-ը դեռևս որևէ կերպ չի ստանձնել կատարվածի պատասխանատվությունը:
Ոստիկանական աղբյուրի հաղորդմամբ` կասկածյալը 28-ամյա երիտասարդ է մայրաքաղաք Կահիրեից հյուսիս ընկած Կաֆր ալ-Շեյխ նահանգից:
Հիշեցնենք, որ հուլիսի 14-ին Հուրգադայի Sunny Days El Palacio հյուրանոցում տեղի ունեցած հարձակման հետևանքով 2 գերմանուհի է զոհվել, ևս 4 մարդ վիրավորվել էր, որոնց թվում` ՀՀ 2 քաղաքացի:
Այսօր հայտնի է դարձել, որ նրանցից մեկը գտնվում է տեղի հիվանդանոցի վերակենդանացման բաժանմունքում, մյուսը պատրաստվում է դուրս գրվել: