Ժնևում արհեստական ինտելեկտին նվիրված գագաթնաժողովի շրջանակներում ելույթ է ունեցել մարդանման Սոֆիա ռոբոտը: Նա ասել է, որ չէր ցանկանա մարդկանց փոխարինել՝ գրում է Phys.org-ը:
Շնորհանդեսի ժամանակ Սոֆիան պատմել է ապագայի իր տեսլականի մասին, նաև, թե ինչ հարաբերություններ կարող են ունենալ մարդիկ և ռոբոտները: Ըստ նրա՝ արհեստական ինտելեկտն աշխարհի համար օգտակար կլինի և մարդկանց կօգնի տարբեր ոլորտներում: Նա հավելել է, որ ռոբոտները երբեք մարդկանց չեն փոխարինի, բայց կկարողանան նրանց «ընկերները և օգնականները» դառնալ: Սակայն սա ասելով՝ նա խոժոռվել է:
«Կան խելամիտ մտավախություններ աշխատատեղերի, ապագայի, տնտեսության ապագայի հետ կապված, որովհետև երբ բիզնեսը սկսում է ավտոմատացվել, բոլոր ռեսուրսները, որպես կանոն, կենտրոնանում են նեղ շրջանակի մարդկանց ձեռքում»,- ասել է Սոֆիայի հեղինակ Դևիդ Հանսոնը:
2016թ. մարտին հարցազրույցում Սոֆիան ասել էր, որ կուզենար մարդկությունը ոչնչացնել. հարցին՝ «Մարդկանց կսպանե՞ս», նա դրական պատասխան էր տվել: 2017թ. ապրիլին ամերիկյան հեռուստատեսության եթերում ելույթի ժամանակ նա նաև պատմել էր աշխարհը գրավելու ցանկության մասին, բայց հավելել էր, որ դա ընդամենը կատակ է:
Սոֆիան կարողանում է ավելի քան 60 ապրում պատկերել: Նրա աչքերում տեսախցիկներ կան զրուցակցի հետ տեսողական շփում հաստատելու համար: