Որքան մոտենում է Ս. Զատիկյանի սպանության գործի 4-րդ դատավարության ավարտը, այնքան անհանգիստ և ագրեսիվ պահվածք են դրսևորում ամբաստանյալն ու դատարան եկող նրա շրջապատի որոշ անձինք… տողերիս հեղինակի լրագրողական դիտարկումների, հրապարակումների առնչությամբ:
ԵԿՄ Մալաթիա տարածքային կառույցի նախագահ, 2006թ-ին հենց համայնքի կենտրոնում ինքնաձիգի կրակոցներից սպանված Սեդրակ Զատիկյանի գործով մեղադրվող՝ սպանության 2-րդ «պատվիրատու» Նարեկ Խաչատրյանի մասով դատաքննությունն այսօր վերջապես ավարտվեց:
Մինչ այդ դատարանն անդրադարձավ մեղադրողի՝ հանրապետությունից բացակայող վկա Ահարոն Հակոբյանի վերաբերյալ միջնորդությանը, որով խնդրել էր պարզել՝ վկան վերադարձե՞լ է Հայաստան, թե ոչ:
Դատարանը հրապարակեց համապատասխան մարմնից ստացված գրությունը. ըստ այդմ՝ վկան Հայաստանի Հանրապետության սահմանը հատել է 07.01.2015թ.-ին՝ «Զվարթնոց» օդանավակայանից և մինչ օրս չի վերադարձել:
Հրապարակվեց նաև նախորդ նիստի հետաձգման պատճառի գրավոր հիմքը՝ պաշտպան Վարդուհի Էլբակյանի վիրահատության մասին: Իսկ թե որտեղից էր այն ստացվել՝ հայտնի չէր:
Այնուհետև պաշտպանն ասաց, որ չի հրաժարվում վկային հարցաքննելու իր միջնորդությունից, ուզում է լրացնել այն, սակայն դատարանի ճշտող հարցին ի պատասխան՝ այն որակեց որպես հայտարարություն:
Պաշտպանը հիշատակեց ՄԻԵԴ-ի, Վճռաբեկ դատարանի ևս 2 նախադեպային որոշում վկային չհարցաքննելու հետևանքների մասին, որոնց մեկ անգամ ևս հակադարձեց տուժողի իրավահաջորդի ներկայացուցիչ Վաղարշակ Գևորգյանը. Նշեց, որ Ահարոն Հակոբյանը միակ առանցքային վկան չէ, և որ նրա ցուցմունքները հիմնավորվել են նաև այլ ապացույցներով:
Մեղադրողը ոչինչ չասաց՝ գուցե այն պատճառով, որ վերջին նիստում պաշտպանի փոխարեն ինքն էր միջնորդել գտնել վկային:
Պաշտպանը դատարանին ներկայացրեց ամբաստանյալ Նարեկ Խաչատրյանի վերաբերյալ խնդրագիրն ու բնութագիրը՝ ստացված «Բարեգործ» ՀԿ-ից և ամբաստանյալի 6 հարևաններից: Նրանց ձևակերպմամբ՝ Նարեկը խելոք, մեծերին, փոքրերին հարգող, ծնողների կողմից սիրված երիտասարդ է, օգնել է հաշմանդամներին, սոցիալապես անապահով ընտանիքների:
Դատարանն ավարտեց դատաքննության փուլը և անցավ դատական վիճաբանությունների փուլ՝ լսելու կողմերի ճառերը և ամբաստանյալի վերջին խոսքը:
Սակայն, չգիտես ինչու՝ մեղադրող Վահագն Պողոսյանը պատրաստ չէր պաշտպանական ճառին և մեկ շաբաթ ժամանակ խնդրեց:
Պաշտպանն էլ հավելեց, որ իրեն 20 օր ժամանակ անհրաժեշտ կլինի 20 հատորանոց գործով պաշտպանական ճառին պատրաստվելու համար: Դատավոր Ռոբերտ Պապոյանն էլ ուղղեց՝ 20 հատոր չէ, այլ 14:
Հաջորդ դատական նիստը տեղի կունենա մայիսի 30-ին՝ ժամը 12,30-ին: Այդ օրը մեղադրողի պահանջած պատժաչափից ու այլ հանգամանքներից պարզ կդառնա պետության վերաբերմունքն ու տրամադրությունները՝ հանցագործությունների բացահայտման և կանխարգելման ձգտման առումով:
Հ. Գ. Հարկ ենք համարում արձանագրել, որ ոստիկանության ուղեկցող գումարտակը անհրաժեշտ խստություն չի ցուցաբերում ծանր հանցագործության մեջ մեղադրվող անձին զսպելու համար, դատարան է բերում առանց ձեռնաշղթաների, դատական կարգադրիչներն էլ հատուկ միջոցներ չունեին՝ անհրաժեշտության դեպքում կիրառելու և դատարանի դահլիճում կարգուկանոն հաստատելու համար: