Նախկին պատգամավոր Թևան Պողոսյանը ֆեյսբուքում այսօր հրապարակել է մի լուսանկար, որը բավական լայն տարածում է ստացել, քանի որ վերաբերում է բոլորովին վերջերս մեծ աղմուկ հանած մի թեմայի:
Խոսքը Դավիթաշենում հայտնի ծառահատման դեպքի մասին է, որի համար կա նույնիսկ ձերբակալված: Թևան Պողոսյանը հրապարակել է հատված հաստաբուն ծառերից մեկի լուսանկարը, որտեղ երևում է, թե ինչպես է ծառը նոր կյանք ստանում՝ աճող շիվի տեսքով: Պողոսյանը հիշեցնում է, որ ծառահատման մեղադրանքով ձերբակալվել է 4 անչափահաս երեխաների հայրը, չնայած նա բացատրում էր, որ դրանք իր տնկած ծառերն են եղել, և ինքը ոչ թե հատել, այլ էտել է ծառերը:
Բնությունը հաստատում է մարդու բացատրությունը՝ պատասխան տալով իշխանությանը, մինչև անգամ Սերժ Սարգսյանին: Որովհետև Դավիթաշենի ծառահատման այդ դեպքը հասավ մինչև Սերժ Սարգսյան, և դեպքի վերաբերյալ նրա կարծիքը ներկայացրեց նաև նախագահի մամուլի խոսնակը:
Սերժ Սարգսյանը կարծիք հայտնեց հատված ծառերի մասին, երբ մի ամբողջ հանրապետություն մեկ տարի առաջ ապրիլին սպասում էր, որ նա կարծիք հայտնի Արցախի դեմ սկսված պատերազմի մասին, ստեղծված իրավիճակի, բանակում կոռուպցիայի, առաջնագծում թերացումների մասին՝ որպես Գերագույն գլխավոր հրամանատար: Պարզվեց, սակայն, որ պատերազմը նրա կարծիքին «արժանի» չէր, իսկ ահա ծառահատումը արժանացավ անմիջական ցուցումի՝ պատժել մեղավորներին: Որովհետև մեկ տարի առաջ խորհրդարանական ու Երևանի քաղաքապետի ընտրություններ չկային, դիվիդենդ հավաքելու անհրաժեշտություն չկար: Հակառակը՝ կար պատասխան տալու անհրաժեշտություն, հետևաբար Սերժ Սարգսյանը լուռ էր:
Իսկ հիմա Սերժ Սարգսյանը ստանում է բնության պատասխանը, բավական խոսուն և անկասելի պատասխանը, որովհետև մարդն ի վերջո անզոր է բնության դեմ: Մինչդեռ Սերժ Սարգսյանն իր հիմնական անելիքը թողած՝ հրապարակային դիրքորոշում էր հայտնում Երևանում ծառահատման մի դեպքի մասին, որը, ինչպես բնությունն է վկայում, իրականում ծառահատում էլ չէր:
Բայց իշխանությանն, իհարկե, հետաքրքրողը ծառը կամ ծաղիկը չէ: Դրանք իշխանության համար գործիք են ավելի կարևորի՝ հենց իշխանության վերարտադրության, իշխանության շիվերի համար՝ անորակ կառավարման հետևանքով ըստ էության հատված պետականության հաշվին:
Բնությունը Սերժ Սարգսյանին ցույց է տալիս, որ իրականում ինքը գիտի իր գործը, իսկ Սերժ Սարգսյանն ավելի լավ է զբաղվի իր գործով, որն առաջին հերթին պետության տնտեսական, քաղաքական, ռազմական կենսունակությունն ապահովելն է, օրինականությունն ու իրավահավասարությունն ապահովելը, օրենքը ոչ թե ըստ դիվիդենդային նպատակահարմարության, այլ անխտիր կիրառելը, պետական գանձարանի ծախսերի օրինականությունն ու բարոյականությունը վերահսկելն ու երաշխավորելը:
