«Առաջին լրատվական»-ի զրուցակիցն է քաղաքական և ընտրական տեխնոլոգիաների փորձագետ Արմեն Բադալյանը։
– Պարոն Բադալյան, ի՞նչ կտա Երևանի ավագանու ընտրություններում «Ելք» և «Երկիր ծիրանի» ուժերի մասնակցությունը։ Կարծում եք՝ այս ընտրությունները ցանկացած արդյունքի դեպքում էական ազդեցություն կունենա՞ն մասնակցող ընդդիմադիր ուժերի հետագա գործունեության վրա։
– Ապրիլի 2-ը ցույց տվեց, որ նույնիսկ Երևանում կեսից ավելիի դեպքում ընտրակաշառքն աշխատում է։ Իսկ այն պայմաններում, երբ հասարակության կեսից ավելին ընտրակաշառքով է ընտրություն կատարում՝ ընտրական համակարգը չի գործում։ Կապ չունի՝ լավ թե վատ քարոզարշավ կանցկացնես, գուցե մեկ կամ երկու տոկոսով ավելանան կամ պակասեն ձայները, բայց վերջնական արդյունքի վրա ազդեցություն չեն ունենա։ Անկախ քարոզարշավից՝ «Ելքն» ու «Երկիր ծիրանին» հաղթել չեն կարող։ Նրանք կստանան իրենց տեղերը, անկախ ամեն ինչից՝ ներկայացված կլինեն ավագանիում, որովհետև երեքից քիչ ուժ չի կարող ներկայացված լինել։ Բնականաբար, ՀՀԿ-ն իր մեծամասնությունը կապահովի՝ 45-50-ի արանքում, մնացածն էլ կբաշխվի «Ելքի» և «Երկիր ծիրանիի» միջև՝ անկախ նրանց վարած քարոզարշավից։
– Իսկ հասարակական ընկալման մեջ նրանց դիրքերը կամրանա՞ն , թե՞ այս ընտրությունները էական ազդեցություն չեն ունենա։
– Երբ ընտրությունների ինստիտուտը չի աշխատում՝ հասարակական ընկալման ինստիտուտն էլ չի աշխատում։ Պետք է խնդիրը համալիր նայել։ Նրանց դիրքերը չեն ամրապնդվի։ Այսինքն՝ չեն թուլանա, չեն ամրապնդվի՝ կմնան այնպես, ինչպես որ կան։ Խնդիրը հենց սա է։
– Դուք ասացիք, որ ցանկացած դեպքում «Ելքն» ու «Երկիր ծիրանին» չեն կարող հաղթել։ Բայց չե՞ք կարծում, որ առանց ռեյտինգային ընտրակարգի՝ միայն Տարոն Մարգարյանով հեշտ չի լինի լավ արդյունք ապահովել։
– Կարծում եմ՝ ոչ։ Մենք դրա փորձն ունեցել ենք 2009 թվականին՝ այն ժամանակ էլ չկար վարկանիշային քվեարկությունը, նաև 2013-ին կարողացան համամասնական ձևով մեծամասնություն ապահվել։ Բնավ կարևոր չէ՝ վարկանիշային օդիոզ դեմքերը մասնակցում են, թե ոչ։ Իհարկե, նրանց կկանչեն նախագահական նստավայր և կստիպեն, որ իրենց ընտրատարածքում համապատասխան ֆինանսական աջակցություն ցուցաբերեն ընտրողներին և համապատասխան տոկոս ապահովեն։ Այդ ֆինանսական աջակցության թիվը կարող է քիչ լինել՝ 5000-10.000-ի սահմաններում։ Ավանում գուցեև մի փոքր բարձր լինի՝ հաշվի առնելով, որ թեկնածուն Ավանից է։ Մնացած տեղերում խնդիր չկա՝ ՀՀԿ գործարարները, օդիոզ դեմքերը կապահովեն Հանրապետականի համար ցանկալի մեծամասնությունը։
