ՀՀ տնտեսական զարգացման և ներդրումների նախարարությունում տեղի ունեցավ «Քեյ Փի Էմ Ջի» ընկերության կողմից պատրաստված Հայաստանի ներդրումային ու գործարար միջավայրը ներկայացնող տեղեկատվական նյութերի շնորհանդեսը: Շնորհանդեսին ներկա էին ՀՀ տնտեսական զարգացման և ներդրումների նախարար Սուրեն Կարայանը, փոխնախարար Հովհաննես Ազիզյանը, «Քեյ Փի Էմ Ջի» ընկերության Ռուսաստանի ու ԱՊՀ մյուս երկրների գործընկերների խորհրդի անդամ Վիկտոր Ակուլյանը և կազմակերպության հայաստանյան գրասենյակի ղեկավար Տիգրան Գասպարյանը:
«Քեյ Փի Էմ Ջի» ընկերության Ռուսաստանի ու ԱՊՀ մյուս երկրների գործընկերների խորհրդի անդամ Վիկտոր Ակուլյանը նախարարին ներկայացրեց Հայաստանի ներդրումային ու գործարար միջավայրը ներկայացնող տեղեկատվական նյութերը: Նրա խոսքով` տեղեկատվական նյութերը բավականին գրավիչ են:
«Այն ներկայացնում է Հայաստանի հնարավորությունների լայն շրջանակը: Ամենակարևորն այն է, որ ներկայիս կառավարությունն ընտրել է Հայաստանի հնարավորությունների իրականացման վեկտորը: Հիմնական ուղղությունը, որ ներկայացված է նյութերում, հիմնված է «խելացի» տնտեսության հնարավորությունների վրա, որը թույլ կտա տեղեկատվական տեխնոլոգիաների, ինովացիայի, գյուղատնտեսության, զբոսաշրջության և այլ ոլորտների զարգացումը»,- ասաց Ակուլյանը:
Նա նաև նշեց, որ տարբեր ոլորտներում աշխատելով՝ պետք է հնարավորինս աջակցեն կառավարությանը` պոտենցիալ ներդրողների ներգրավվածությունն ավելի ընդլայնելու ուղղությամբ:
ՀՀ տնտեսական զարգացման և ներդրումներ նախարար Սուրեն Կարայանն ընդգծեց, որ տեղեկատվական նյութերում ներկայացված է Հայաստանի իրական պատկերը:
«Մեր նպատակն էր, որ «Քեյ Փի Էմ Ջի» ընկերությունը ներկայացնի Հայաստանի իրական պատկերը, որպեսզի մեր պոտենցիալ ներդրողները վստահ լինեն, որ այն տեղեկատվությունը, որն այստեղ նշված է, համապատասխանում է իրականությանը, որն իրականացվում է նման հեղինակավոր կազմակերպության կողմից»,- ասաց նախարարը:
Նախարարը կարևորեց ընկերության հետ շարունակական աշխատանքը: