Ռուսաստանը Հայաստանի քաղաքական իրադրության վրա ազդելու լծակ չունի և չի աջակցում որևէ քաղաքական ուժի՝ ներառյալ իշխող կուսակցությանը՝ «Առաջին լրատվական»-ի հետ զրույցում հայտարարեց ռուսական «Ռեգնում» լրատվական գործակալության գլխավոր խմբագիր, քաղաքական վերլուծաբան Մոդեստ Կոլերովը՝ հերքելով այն տեսակետը, որ ՀՀ նախագահ Սերժ Սարգսյանի առաջիկա այցը Ռուսաստան կարող է կապված լինել Հայաստանի ներքաղաքական իրադարձությունների հետ:
Ի հեճուկս հայաստանյան և օտարերկրյա բազմաթիվ հեղինակավոր փորձագետների հետազոտությունների և գնահատականների, Հայաստանում Ռուսաստանի ռազմական ներկայության, տնտեսության տարբեր ոլորտներում ռուսական ընկերությունների ներկայության, հատկապես էներգետիկ շուկայում ռուսական «Գազպրոմի» մենաշնորհային դիրքերի և մի շարք այլ փաստերի՝ ռուսաստանցի քաղաքագետ Մոդեստ Կոլերովը պնդում է, որ Մոսկվան Հայաստանի ներքին քաղաքականության վրա ազդելու որևէ գործնական լծակ չունի, կամ եթե ունի, ապա գործնականում չի կարող դրանք կիրառել:
ՀՀ նախագահ Սերժ Սարգսյանը մարտի 14-ին երկօրյա պաշտոնական այցով կմեկնի Մոսկվա, որտեղ կհանդիպի Ռուսաստանի Դաշնության բարձրագույն ղեկավարության հետ:
– Պարոն Կոլերով, ո՞րն է ՀՀ նախագահի մոսկովյան այցի իրական նպատակը, եթե մի կողմ դնենք երկկողմ հարաբերություններին առնչվող օրակարգային հարցերը, Ղարաբաղյան խնդիրը, որոնք սովորաբար քննարկվում են Հայաստանի և Ռուսաստանի ղեկավարների միջև: Որքանո՞վ է այն կապված Հայաստանի ներքին քաղաքականության և նախընտրական գործընթացների հետ: Որոշ վերլուծաբաններ ասում են, թե Սարգսյանը գնում է Մոսկվա՝ ստանալու Պուտինի աջակցությունը իր քաղաքական ծրագրերի իրագործմանը:
– Հայաստանի իշխանությունները վերջին տասնամյակներին իրենց ընտրական արշավները ավանդաբար կապում են Ռուսաստանի գործոնի հետ: Ես չգիտեմ, թե որքանով է դա իրենց օգնում իրականում, բայց փաստ է, որ այդպիսի փորձեր արվում են՝ կապելու ընտրությունները Ռուսաստանի հետ: Կարծում եմ, որ այցելությունները Մոսկվա ոչ մի կերպ չեն ազդում և չեն ազդելու Հայաստանի ընտրողների տրամադրությունների վրա:
– Այսինքն՝ նկատի ունեք, որ քաղաքական ուժերը շատ հաճախ օգտագործում են այդ քայլը իրենց քարոզչության մեջ, որ ցույց տան, թե Ռուսաստանը աջակցո՞ւմ է իրենց:
– Այո, ընդ որում՝ նաև ընդդիմությունն է ասում, թե իբր Մոսկվայի հետ ամեն ինչ համաձայնեցված է, պայմանավորված է և այլն, և այլն, բայց դա հեքիաթ է: Մոսկվան որևէ գործիք չունի Հայաստանի ներքաղաքական օրակարգի վրա ազդելու:
– Բայց չէ՞ որ Մոսկվան իրականում շատ լծակներ ունի Հայաստանում:
– Ես գիտեմ ձեր դիրքորոշումը: Իսկ, օրինակ, ի՞նչ լծակներ ունի:
– Անվտանգություն, տնտեսություն, էներգետիկ:
– Իսկ ինչպե՞ս օգտագործել այդ լծակները գործնականում:
– Կարծում եմ՝ Կրեմլում ինձնից լավ գիտեն՝ ինչպես օգտագործել, այդպես չէ՞:
– Ոչ մի կերպ չեն կարող ազդել: Մոսկվան արդեն չի կարող ազդել անգամ Հայաստանի քաղաքացիների աշխատանքային միգրացիայի վրա, որովհետև Հայաստանը Եվրասիական միության անդամ է:
– Այդ դեպքում այսպիսի հարց. կարո՞ղ եք ասել, թե ինչու են Հայաստանի ընդդիմության առաջնորդները նախագահի ընտրությունների կամ քաղաքական որևէ այլ լուրջ գործընթացի նախօրեին մեկնում Մոսկվա՝ հանդիպելու Ռուսաստանի բարձրաստիճան պաշտոնյաների հետ: Այդ այցերը, կարելի է ասել, ավանդույթ են դարձել:
– Որովհետև նրանք նույն այդ քարոզչության գերիներն են, որի մասին նշեցիք վերևում, թե Ռուսաստանը կարող է ազդել Հայաստանի ներքին իրավիճակի վրա: Չի՛ կարող: Իրենք հորինել են, իրենք վախենում են դրանից, իրենք էլ շրջանառում են այդ տեսակետը: