Հայաստանն ակտիվ աջակցում է Եվրասիական տնտեսական միության և Իրանի միջև ազատ առևտրի գոտի ստեղծելու հնարավորությանը: Այս մասին RIA Novosti գործակալությանը տված հարցազրույցի ժամանակ հայտարարել է ՀՀ ԱԳ նախարար Էդվարդ Նալբանդյանը:
Գործակալությունը նշում է, որ երեքշաբթի ՌԴ առաջին փոխվարչապետ Իգոր Շուվալովն այցելելու է Իրան՝ ԵՏՄ-ի երկրների հետ ազատ առևտրի գոտի ստեղծելու վերաբերյալ բանակցությունների համար:
«Ներկայում քննարկվում է Իրանի և Եվրասիական տնտեսական միության միջև ազատ առևտրի գոտու ստեղծման հնարավորությունը, որին մենք, իհարկե, ակտիվ աջակցում ենք»,- ասել է Էդվարդ Նալբանդյանը:
Նա նաև ընդգծել է իրանական բիզնեսը հայկական շուկա ներգրավելու հեռանկարները: Նախարարի խոսքով՝ Թեհրանը և Երևանը շարունակում են աշխատել բիզնես միջավայրի և միմյանց համար ներդրումային հնարավորությունները բարելավելու ուղղությամբ: «Այս գործընթացում կարևոր քայլ էր մեր երկրների միջև վիզայի ռեժիմի ազատականացումը, ինչը ևս կնպաստի երկկողմանի առևտրա-տնտեսական կապերի խորացմանը»,-հավելել է ՀՀ ԱԳ նախարարը: