«Առաջին լրատվական»-ի զրուցակիցն է դերասան, բեմադրիչ Աշոտ Ադամյանը (ԱՄՆ):
– Պարոն Ադամյան, հետևո՞ւմ եք Հայաստանում տեղի ունեցող նախընտրական զարգացումներին: Ինչպե՞ս եք գնահատում:
– Իհարկե, հետևում եմ… անկեղծ ասեմ՝ հիասթափված եմ, որովհետև որևէ դրական միտում չեմ տեսնում։ Մարգինալացման այսպիսի պատկեր միայն մղձավանջային երազում կարելի է տեսնել։
– «Արդարություն Հայաստանում» նախաձեռնությունը՝ Արսինե Խանջյանի և Ատոմ Էգոյանի գլխավորությամբ, կլինի Հայաստանում ընտրություններին և ընտրատեղամասերում կվերահսկի գործընթացը: Ի՞նչ կփոխի նրանց ներկայությունը: Արդյոք Սփյուռքը կարո՞ղ է կամ որքա՞ն իրավասություն ունի խառնվելու Հայաստանի գործերին: Այս քննարկումները հիմա ավելի շատ են հանդիպում:
– «Արդարություն Հայաստանում» նախաձեռնության ծրագրերին տեղյակ եմ… Ատոմ Էգոյանը պարզ ու հստակ նշել է, որ իրենք շատ լավ հասկանում են, որ ընտրությունների արդյունքների վերաբերյալ չեն տառապում վարդագույն երազներով… ես ևս կարծում եմ, որ վերջնական արդյունքը դրանից չի փոխվելու։ Այս նախաձեռնության կարևորագույն նշանակությունն այն է, որ աշխարհասփյուռ հայության շրջանում ծնունդ է առել մի շարժում, որը ենթակա չէ կուսակցական-խմբային և այլ ուղղորդվող կազմակերպությունների ազդեցությանը և հստակ հիմնվում է դիասպորա-հայրենիք ռեալ գիտակցման վրա… Մինչև այսօր սփյուռք-հայրենիք կապը դրսևորվել է միայն ու միայն էմոցիոնալ-բնազդային ձևով՝ թելեթոն, փառատոներ, եկեք տուն, օգնեք Հայրենիքին, քիչ մը փող ուղարկեք, եկեք շքանշան տանք և այլն, և այլն։ «Արդարություն Հայաստանում» նախաձեռնողների ծրագրում հստակ ասվում է, որ արտերկրի հայությունը տեր է կանգնում Հայաստան երկրի նկատմամբ իր շահագրգիռ վերաբերմունքը դրսևորելու իրավունքին։ Իսկ «իրավունք ունեն-չունեն» քննարկումներին բացարձակ ուշադրություն չեմ դարձնում՝ դրանք պղտոր ջրեր փնտրող խմբերի խաղիկներն են։
– Իշխանությունը հեռացնելու ընդդիմության ջանքերն ինչպե՞ս եք գնահատում: ՀՀԿ–ն լքողների բանակը կարո՞ղ է լուրջ ազդեցություն ունենալ ընտրությունների արդյունքի վրա՝ ընդհուպ իշխանության կորստի:
– ՀՀԿ-ն լքողները կազդեն, անշուշտ, ՀՀԿ-ի վրա, բայց ոչ մի լավ բանի չեն հանգեցնի՝ համակարգը ոնց փտած էր, այդպես փտած էլ կմնա… Տխուր է պատկերը… Է, թող որ ես սխալվեմ…