ԱԺ նախկին պատգամավոր, գործարար Հակոբ Հակոբյանը (Ճոյտ) միացել է «Ծառուկյան» դաշինքին և ռեյտինգային ընտրակարգով առաջադրվելու է Արմավիրի մարզում։ Այս մասին «Առաջին լրատվական»-ի հետ զրույցում ասաց ինքը՝ Հակոբյանը։
«Ես անցած տարվա վերջին իմ ընկերներին խնդրել էի, որպեսզի ուսումնասիրություն կատարեին, թե ես որ կուսակցության հետ կարող եմ գնալ, որ կուսակցությանն է ավելի շատ վստահում ժողովուրդը։ Բոլոր ուսումնասիրությունները հանրագումարի բերեցինք, և ես որոշում կայացրեցի, որ «Ծառուկյան» դաշինքի հետ գնամ ընտրությունների»,- ասաց Հակոբյանը։
Վերջինից հետաքրքրվեցինք՝ իր կարծիքով՝ Գագիկ Ծառուկյանն ավելի մեծ ժողովրդականություն է վայելում, քան ՀՀԿ-ն ու իր ղեկավա՞րը, դրա՞ համար չի միացել ՀՀԿ-ին։ «Առաջին հերթին ՀՀԿ-ն իր թեկնածուներն ունի, նրանք շատ են, և հետո մեր ուսումնասիրությունները ցույց տվեցին, որ Ծառուկյանն ավելի մեծ վստահություն է վայելում, քան որևէ այլ կուսակցություն։ Այդ վստահությունը իմ մեջ ավելի մեծ համարձակություն մտցրեց, որպեսզի ես գնամ այդ դաշինքով։ Վերջնական որոշումը ժողովուրդն է կայացնում, իսկ ժողովրդի կարծիքը չլսել, անտեսել՝ միայն հիմար մարդը կարղ է»,- նկատեց նախկին պատգամավորը։
Նշենք, որ ՀՀԿ-ից Արմավիրի մարզում ռեյտինգայինով առաջադրվողները շատ են, կարելի է ասել՝ ԵԿՄ հիմնական կազմը։ Հավանական թեկնածուներն են Առաքել Մովսիսյանը, Սեյրան Սարոյանը, Հրանտ Գրիգորյանը, Նահապետ Գևորգյանը։
Հակոբ Հակոբյանը բոլորին էլ մրցակից է համարում, բայց նշում է, որ չի պատրաստվում մրցակցել նրանց հետ. «Ցանկացած մեկը, ով կդնի, ես ուրախ կլինեմ։ Ով էլ դնի, իմ մարզի բնակիչն է, որին ես հարգում եմ։ Մենք չենք մրցելու, մենք ժողովրդին ներկայացնելու ենք մեր ծրագիրը, ու ժողովուրդն է մրցելու, թե որի թեկնածուն է հաղթելու։ Ավելի շատ ժողովուրդն է մրցելու»: